Habaye inama mpuzabikorwa ngarukamwaka yateraniye kuri sitade y'Akarere ka Ngororero.
Ni inama ihuza inzego z'ubuyobozi kuva ku mudugudu kugeza ku Karere ikaganirirwamo ubuzima bw'Akarere mu nkingi zose  (umutekano, ubukungu, imibereho n'imiyoborere myiza)
Iy'uyu munsi yitabiriwe na Guverineri w'intara y'Iburengerazuba Hon. Dushimimana Lambert, Umuyobozi w'inama Njyanama y'Akarere Madamu Nyiramasengesho Jeannette, Komite Nyobozi y'Akarere, abayobozi b'inzego z'umutekano zikorera mu Karere, abanyamabanga nshingwabikorwa b'imirenge n'abayobozi b'amashami.

Iyi nama yateranye mu gihe kwibuka ku nshuro ya 30 Jenoside yakorewe Abatutsi byegereje. Abaturage basabwe kwitegura neza kwinjira mu bihe byo kwibuka baganizwa ku bumwe n'ubudaheranwa bw'Abanyarwanda, gahunda ya Ndi Umunyarwanda, kurwanya ingengabitekerezo ya jenoside n'ipfobya ryayo, kwegera no kwihanganisha abarokotse Jenoside yakorewe Abatutsi..
Turimo kwitegura kandi amatora ya Perezida wa Repubulika n'ay'Abadepite. Abayobozi basabwe gutegura neza abaturage bakazitabira icyo gikorwa cy'ingirakamaro giteganijwe muri Nyakanga/2024.
Muri iyi nama habayeho kungurana ibitekerezo ku mihigo by'umwihariko ishyirwa mu bikorwa n'abaturage bidasabye ingengo y'imari, gahunda za Leta, umutekano, kurwanya ubukene, imirire mibi n'igwingira.
Habayeho guhemba inzego zageze ku bipimo bishimishije muri Ejo Heza, kwishyura ubwisungane mu kwivuza, isuku n'isukura, ubwishingizi bw'amatungo, kubakira abatishoboye amacumbi, guhanga imirimo, guhanga udushya,....
Umuyobozi w'Intara y'Iburengerazuba Dr Dushimimana Lambert yashimiye inzego z'ibanze by'umwihariko abayobozi b'imidugudu uruhare rwabo mu kwegera abaturage babunganira mu gukemura ibibazo bafite.
Yabasabye kubaba hafi by'akarusho muri iki gihe "twitegura kwibuka ku nshuro ya 30 Jenoside yakorewe Abatutsi". Yabashishikarije gukomeza kurangwa no gukunda igihugu bikazagaragarira mu kwitabira amatora ateganijwe muri Nyakanga 2024.