Akarere ka Ngororero ni kamwe mu tugize Intara y'Uburengerazuba twagizweho ingaruka zikomeye z'ibiza kakanatakaza abantu 23 mw'ijoro ryo kuwa 2 rishyira uwa 3 Gicurasi 2023. Nyakubahwa Madamu wa Perezida wa Repubulika Jeannette Kagame ari kumwe na ba Minisitiri uw'Ubutegetsi bw'Igihugu Hon. Musabyimana Jean Claude, uw'Imicungire y'ibiza Hon. Kayisire Marie Solange na Guverineri w'Intara y'Uburengerazuba Bwana Habitegeko Francis yasuye imiryango yagizweho ingaruka z'ibiza mu rwego rwo kubafata mu mugongo no kubahumuriza.

Mu kubihanganisha yagize ati: "Iteka kubura uwawe nk'uko byagenze, bishengura umutima. Ababuze ababo mukomere, mwihangane kandi turabizeza ko turi kumwe namwe. Twifatanije kandi n'utundi turere twose twashegeshwe n'ibiza, turabashimira ko mukomeje kwihangana mu bihe bigoye... Ibyago ntibiteguza, iyo biba biteguza tuba twaririnze tukarinda n'abacu. Imana ikomeze ibakire."

Madame Jeannette Kagame yagarutse ku muco mwiza w'abanyarwanda wo gutabara  mu bihe bikomeye, ashimira abayobozi n'abafatanyabikorwa batandukanye batazauyaje mu gutabara abaturage bari mu kaga. Ati natwe nk'ababyeyi uyu munsi twabazaniye ubutumwa bwo kubakomeza; mukomere kandi mukomeze kwihangana...Twishimiye ko ubuzima butangiye kugaruka, ababuze ababo mukomeze kwihangana kandi turabizeza ko turi kumwe namwe. First Lady yashimiye abaturage ukwihangana bagize mu bihe bigoye n'uburyo bagaragaje mu kwishakamo ibisubizo.

Yashimiye ubuyobozi bwiza bw'Igihugu cyacu n'abafatanyabikorwa ko bakoze ibishoboka byose ubutabazi bukagera kuri buri wese kandi mu gihe gikwiriye. Yashimiye ama paroisse n'insengero bahaye baturage aho gukinga umusaya... Yakomoje ku bihe bikomeye u Rwanda rwanyuzemo ati nk'uko twatsinze urugamba rwa Covid-19 uru narwo tuzarutsinda kuko dufite ubuyobozi bwiza bwita ku baturage.

Madamu Jeannette Kagame yakomoje ku ngaruka mbi ziterwa no gufata nabi bidukikije agira ati "ibidukikije  ni umuturanyi mwiza udufatiye runini tugomba kumufata neza."

Yasabye imiryango kwita ku bayigize by'umwihariko abana bato n'abandi banya ntege nke. Aha yagarutse ku igwingira rirangwa mu Karere ka Ngororero asaba ko hafatwa ingamba zihamye zo kurirwanya hategurwa indyo yuzuye hanitabwa kw'isuku ahantu hose; hirindwa indwara zaturuka ku mwanda.

Mu ruzinduko rwe Madamu Jeannette Kagame yabanje gusura irerero ry'abana bato rifasha imiryango yagizweho ingaruka n'ibiza mu kubungabunga ubuzima bwabo. Abaturage bishimiye uburyo batatareranywe, ubuyobozi bwiza bubitayeho babigaragariza mu imbamutima zabo.

Mu Karere ka Ngororero harangijwe gutoranywa ibibanza bizatuzwamo aba baturage haherewe ku miryango ifite amikoro make kurusha iyindi. Magingo aya harabarurwa sites 14 zicumbitseho imiryango 864 igizwe n'abantu 3559.