Umuyobozi w'Akarere Bwana NKUSI Christophe ari kumwe n'Umuyobozi w'Akarere wungirije ushinzwe iterambere ry’ubukungu Bwana UWIHOREYE Patrick yakiriye itsinda  ryaturutse mu gihugu cy'Ubushinwa riyobowe n'Umuyobozi Mukuru (CEO) wa sosiyete Baoye Hubei Construction Engeneering Group Bwana Gao Lin  wari kumwe na Bwana Feng Gang Managing Director(MD) of Baoye Hubei Construction Engineering Group in Rwanda.

Ni company ikora imirimo itandukanye irimo kubaka imiyoboro y'amazi. Niyo yubatse umuyoboro mugari wakwirakwije amazi meza mu mirenge 6  Muhanda, Kavumu, Sovu, Kageyo, Ngororero na Kabaya kuri 13 igize Akarere ka Ngororero ku mafaranga y'u Rwanda 9,310,517,102. Ufite uburebure bwa km 202 wagejeje amazi meza ku baturage 103, 200 byatumye Akarere kava kuri 68,6% kagera kuri 79% by'abaturage bafite amazi meza. Watanze akazi ku baturage 3460 muri bo1223 ni urubyiruko.
Umuyobozi w'Akarere yashimiye iri tsinda umurimo unoze wakozwe n'akamaro ufitiye abaturage.
Mayor Nkusi: "umushinga watuzaniye amahirwe yo kunoza isuku n'isukura byatumye indwara zikomoka ku isuku nkeya zigabanuka kuko amazi ni ubuzima."
Yabashimiye uburyo imiyoboro yubatse neza ku buryo  buzaramba,  uburyo umushinga watanze akazi kandi ukageza amazi meza ku byiciro bitandukanye.

Umuyobozi w'itsinda yashimiye Akarere umuco wo kwakira abashyitsi, uburyo Akarere karengera ibidukikije, umurava abaturage bakorana, ubuyobozi bwiza bw'Igihugu cyacu bushyigikira ishoramari.
Bashimiye uburyo bakoranye n'Akarere n'abaturage.
Mayor Nkusi yaboneyeho kubagezaho amahirwe aboneka mu Karere ka Ngororero: yabashishikarije gushora imari mu bucukuzi bw'amabuye y'agaciro, ubuhinzi no kubyaza imigezi ingufu z'amashanyarazi.