Abakozi barenga 200 baturutse mu Kigo gishinzwe iterambere ry'ubwikorezi mu Rwanda (RTDA) bayobowe n'Umunyamabanga uhoraho muri Minisiteri y'Ibikorwarenezo  ari nawe wari umushyitsi mukuru, bazindukiye ku rwibutso rwa Jenoside yakorewe Abatutsi mu 1994 rwa Nyange mu gikorwa cyo kwibuka ku nshuro ya 32 Jenoside yakorewe Abatutsi mu 1994. Bunamiye inzirakarengane 8,179 baruhukiye muri uru rwibutso. Bakiriwe n'Umuyobozi w'Akarere @cnkusi20 ari kumwe 
n'abayobozi b'Inzego z'Umutekano zikorera mu Karere,
Perezida wa Ibuka mu Karere n'ubuyobozi bw'umurenge wa Nyange.

Mbere yo gutangira igikorwa cyo kwibuka nyirizina  intumwa za RTDA bahaye inka umubyeyi  witwa Uwabimfura Fortunée  utuye mu kagari ka Nsibo, Umudugudu wa Cyambogo mu rwego rwo kumuremera no kumufasha mu nzira y'iterambere.
Hakurikiyeho gufata umunota wo kwibuka  ndetse no gushyira indabo aharuhukiye imibiri y'inzirakarengane zazize jenoside yakorewe abatutsi mu 1994 mu rwego rwo kubasubiza agaciro n'icyubahiro bambuwe.
Bwana Safari Jean Bosco yatanze ubuhamya bugaruka ku nzira y'umusaraba abarokotse jenoside yakorewe abatutsi mu 1994 bo mu murenge wa Nyange banyuzemo  asoza ashimira Ingabo zabarokoye ndetse anashimangira ko bataheranywe n'agahinda.
Abafashe ijambo bose ndetse n'umushyitsi mukuru bagarutse ku bugome bw'indengakamere bwakoreshejwe ubwo hicwaga abatutsi b'i Nyange, kuko bigoye kumva uburyo uwari Padiri mukuru wa Paroisse Nyange Seromba Athanase yategetse ko basenya kiriziya yari yahungiyemo imbaga y'Abatutsi  kandi ariwe wakabarokoye.
Umushyitsi mukuru yasoje yihanganisha abacitse kw'icumu anabashimira uburyo banze guheranwa n'agahinda ahubwo bagaharanira iterambere rirambye.
#TWIBUKETWIYUBAKA