IBIKORWA BY'INGENZI BYAKOZWE MU KARERE KURI UYU WA 10/08/2023

1. UBUKANGURAMBAGA KURI GAHUNDA YA "TEGA AMATWI UMUTURAGE UMUFASHE"

Uyu munsi mu Murenge wa Ndaro hakomereje ubukangurambaga kuri gahunda ya:"Tega amatwi Umuturage  Umufashe" bugamije kwegera umuturage no gukemura ibibazo bye mu rwego rwo gushyira umuturage ku isonga.

Ubu bukangurambaga bwakozwe n'itsinda riyobowe  n'Umuyobozi w'Akarere Bwana NKUSI Christophe ari kumwe n' Umuyobozi w'Ishami ry'Imiyoborere Myiza mu Karere Madamu MUSABEYEZU Charlotte, Umuhuzabikorwa wa MAJ mu Karere Madamu ABANDIBANA Theresie, District Council Affairs Specialist Bwana MUSABYIMANA Samuel, Umukozi muri One Stop Center Ushinzwe Imikoreshereze y'Ubutaka Bwana KABAGEMA Roger, Uhagarariye Umuyobozi w'Ingabo S/Sgt KAYIBANDA Jean na DASSO.

Abaturage baganirijwe kuri gahunda za Leta zitandukanye hakirwa ibitekerezo hanakemurwa ibibazo by'abaturage.

Ubukangurambaga  buzanakomereza mu yindi Mirenge.

2.GAHUNDA Y'INTORE MU BIRUHUKO

Uyu munsi mu Mirenge itandukanye igize Akarere ka Ngororero hakomeje ibikorwa byo muri gahunda y'Intore mu Biruhuko.

Urubyiruko ruhabwa ibiganiro bitandukanye hakurikijwe ingamba rubarizwamo.

3. KWIZIHIZA UMUNSI MPUZAMAHANGA W'AMAKOPERATIVE

Kuri Guest House y'Akarere ka Ngororero habereye igikorwa cyo kwizihiza Umunsi Mpuzamahanga w'Amakoperative ku  nsanganyamatsiko igira iti: "Amakoperatative yihutisha Iterambere rirambye".

Iki gikorwa cyatangijwe n'Umuyobozi w'Akarere Wungirije Ushinzwe Iterambere ry'Ubukungu Bwana UWIHOREYE Patrick afatanyije n'uwaje ahagariye Rwanda Cooperatives Agency  Bwana MITALI Jean de Dieu.

Iki gikorwa cyitabiriwe   n'aba bakurikira:

-Abayobozi b'Amakoperative 129 yo mu Karere ka Ngororero

-Abakozi bashinzwe Amakoperative mu Mirenge
-Abakozi b'Akarere mu Ishami rya BDE.
- Umuhuzabikorwa wa Ejoheza mu Karere

Igikorwa cyatangiye hasurwa bimwe mu bikorwa by'Amakoperative nyuma hakurikiraho ibiganiro bitandunye byibanze ku nsanganyamatsiko no kuri Ejo Heza.

4. IBIGANIRO N'UMUFATANYABIKORWA YWCA

Uyu munsi Umuyobozi w'Akarere Bwana NKUSI Christophe  yakiriye itsinda ryaturitse ku Mufatanyabikorwa YWCA (Young Women's Christian Association) riyobowe n'Umunyamabanga Mukuru wa YWCA Rwanda Mrs UZAMUKUNDA Pudencienne.

Baganiriye ku mikorere n'imikoranire iranga ubufatanye hagati y'Akarere n'uyu mufatanyabikorwa.

YWCA yunganira Urubyiruko mu guhangana n'ingaruka zatewe na COVID-19 hakorwa ubuhinzi  budakoresha ifumbire mvaruganda, itera inkunga Akarere mu kurwanya imirire mibi n'igwingira.

Uyu mufatanyabikorwa yagobotse Akarere mu gufasha imiryango 40 yahuye n'ibiza aho yatanze amabati 1880 n'imifuka ya Cement 1040.

Umuyobozi w'Akarere yifuje ko Umufatanyabikorwa yakwagurira ibikorwa no mu yindi mirenge kuko asanzwe akorera mu mirenge 3 ariyo Ngororero, Gatumba na Muhororo.

Nyuma yo Kuganira n'Umuyobozi w'Akarere, itsinda ryaturutse muri YWCA  ryasuye itsinda ry'Urubyiruko bakora ubuhinzi bw'imboga mu Murenge wa Muhororo banasura abakora ubudozi mu Murenge wa Ngororero.

5. INAMA Y'ABAFATANYABIKORWA B'AKARERE MU BIKORWA BY'ISANAMITIMA, KUBANISHA NEZA ABANYARWANDA N'UBUDAHERANWA

Mu cyumba cy'inama cy'Akarere habereye Inama yateguwe ku bufatanye bwa PHARP (Peace Building and Reconciliation Programme) n'Akarere yitabiriwe n'abandi bafatanyabikorwa bakora gahunda y'isanamitima, kubanisha abanyarwanda neza n'ibikorwa by'imibereho myiza y'abaturage.

Aya mahugurwa yafunguwe n'umuyobozi wungirije  w'Akarere ushinzwe imibereho myiza, Madamu MUKUNDUHIRWE Benjamine.

Umuryango PHARP wari uhagarariwe na Madame MUKANSANGA Julienne.

Muri iyi nama haganiriwe ku ngingo zikurikira:

-Ihungabana ry'Igisekuru no gufata ingamba zo kudaheranwa naryo.

-Ingamba zo gutegura umuryango nyarwanda mu kubanisha neza abafungurwa barangije igihano cy'icyaha cyo gukora Jenoside n'imiryango yabo, abarokotse Jenoside n'umuryango nyarwanda muri rusange.

- Kugaragaza ibyo PHARP imaze kugeraho mu Karere ka Ngororero.

Imwe mu myanzuro hafashwe ni iyi:

- Gukomeza gutanga ibiganiro bituma abantu basobanukirwa n'ibiranga ihungabana n'ingamba zo kurihagarika mu byiciro byose by'abaturage.

- Gutoza indangagaciro z'imyitwarire n'imibanire myiza bituma amakimbirane agabanuka

-Kwirinda ibiyobyabwenge bitera abantu kuba ibihazi bikoreshwa nabyo ibibi bibangamira umudendezo w'abantu.

-Gutegura  ubukangurambaga bwo gukumira ihungabana cyane mu rubyiruko muri uku kwezi abafatanyabikorwa bose bakabigira ibyabo.

- Kugira urutonde rw'abenda gusoza ibihano muri za gereza no kumenya imirenge yabo igakorwamo ubukangurambaga bwo gutegura societé kubakira.

- Gutegura gahunda yo gusura abagororwa mu magororero

6. AMAHUGURWA Y'AMATSINDA Y'ABANTU BAFITE UBUMUGA

Mu cyumba cy’Inama cy’Akarere ka Ngororero, ku bufatanye bw’Akarere n’Umufatanyabikorwa NUDOR, hahuguwe urubyiruko 65 bafite ubumuga butandukanye bibumbiye mu matsinda 7 yo mu mirenge 3 ya Hindiro, Muhoro na Ngororero.

Uru rubyiruko rwigishijwe imyuga itandukanye ku bufatanye bw’Akarere na NUDOR harimo gukora inkweto, kuboha imipira, ububaji, gutunganya imisatsi n’inzara no gusudira.

Aya mahugurwa yatanzwe n'Itsinda ryaturutse muri NUDOR rigizwe na RUGENZA Kevin, Emile NIYONKURU na Eric NIYOYITA.

Madamu Mukunduhirwe Benjamine, Umuyobozi w’Akarere Wungiririje Ushinzwe Iterambere ry’Imibereho Myiza y'Abaturage wafunguye aya mahugurwa, yasabye urubyiruko rwahuguwe kudapfusha ubusa icyizere bagiriwe na Leta y’u Rwanda, abasaba gukomeza gukorera hamwe, kwizigamira, kwirinda ibiyobyabwenge anabibutsa ko ubumwe no gushyira hamwe ari cyo kizihutisha iterambere ryabo.

Aya mahugurwa azakomeza ku munsi w'ejo kuwa 11/08/2023 aho abahuguwe bazahabwa ibikoresho bijyanye n’imyuga bahuguwemo bazifashisha  mu matsinda bakoreramo kugira ngo babashe kwiteza imbere.