Umunsi mukuru mpuzamahanga w'abantu bafite ubumuga wizihirijwe mu murenge wa Muhororo ku rwego rw'Akarere ku nsanganyamatsiko igira iti: "Dushyigikire umuryango udaheza abantu bafite ubumuga; Ishingiro ry’imibereho myiza.”

Iki gikorwa cyitabiriwe n’imbaga y'ababtu batandukanye barimo:
Abagize Komite Nyobozi y’Akarere, Abayobozi b’Inzego z’Umutekano, abafatanyabikorwa batandukanye bakorera mu Karere , Abayobozi n'abaturage b'Umurenge wa Muhororo.

Ibyaranze umunsi:
- kumurika ibikorwa by'abantu bafite ubumuga 
- Gusobanura insanganyamatsiko y’uyu mwaka n’akamaro ko gushyigikira abafite ubumuga mu rwego rw’iterambere rirambye;
- Ikiganiro ku burenganzira bw’abafite ubumuga n’uburyo serivisi zose zigomba kubageraho nta nkomyi;
- kugaragaza ibikorwa ndashyikirwa bifasha abafite ubumuga;
- Ubuhamya bwatanzwe n’abafite ubumuga bugaragaza intambwe imaze guterwa;
- kuremera inka n'ibikoresho byo mu rugo bamwe mu bafite ubumuga. 
Ibiganiro byatanzwe byagiye byibutsa ko:
- abafite ubumuga   bafite uruhare mu iterambere ry’Akarere mu ngeri zose;
- gahunda zose z’iterambere zigomba kubatekerezaho ku buryo bwuzuye;
- ubwitabire bw’abafatanyabikorwa bugomba gukomeza kwiyongera mu mishinga ibafitiye akamaro.
Umuyobozi w’Akarere Bwana NKUSI Christophe yibukije ko abafite ubumuga bashoboye asaba imiryango kudahishira impano zabo zibaha amahirwe yo kwiga, kwitabwaho no kugaragaza ubushobozi bifitemo. Meya Nkusi yibukije ko iterambere ry’igihugu rishingiye kuri buri wese kandi ko abafite ubumuga badahejwe kuko bashoboye mu nzego zose.
Yagize ati:  “Iterambere ry’igihugu rishingiye kuri buri Munyarwanda wese. Abafite ubumuga ntibahejwe kuko bafite ubushobozi mu buyobozi, ubucuruzi, uburezi, ubuhanzi n’izindi nzego. Umuryango ugomba kubaha urubuga kugira ngo bagaragaze ibyo bashoboye.”
Umunsi mukuru witabiriwe ku rwego rushimishije kandi wagaragaje ubushake bw’Akarere n'abafatanyabikorwa bwo gukomeza gushyigikira no guteza imbere abafite ubumuga hatagize usigara inyuma.