ABAFANA BA APR FC BATURUTSE MU KARERE KA MUSANZE BAJE MU KARERE KA NGORORERO KWIBUKA KU NSHURO YA 29 JENOSIDE YAKOREWE ABATUTSI MU 1994

Uyu munsi Abafana b'Ikipe y'Umupira w'amaguru y'Ingabo z'Igihugu (APR FC) basuye Akarere ka Ngororero baje mu gikorwa cyo kwibuka ku nshuro ya 29 Jenoside yakorewe Abatutsi mu 1994.

Aba bafana bari bayobowe na Perezida wabo Bwana NGABONZIZA Louis bakiriwe n'Umujyanama wa Komite Nyobozi y'Akarere Bwana MUTWARANGABO Innocent ari kumwe na Visi Perezida wa IBUKA mu Karere Bwana MUNGWARAKARAMA Alexandre.

Hasuwe Urwibutso rwa Jenoside yakorewe Abatutsi mu 1994 rwa Kibilira hakorwa ibi bikurikira:

-Gusobanurirwa amateka ya Jenoside yakorewe Abatutsi mu 1994 by'umwihariko mu cyahoze ari Komini Kibilira

- Gusura Urwibutso rwa Jenoside yakorewe Abatutsi mu 1994 rwa Kibilira no Gushyiraho indabo

-Ubuhamya bw'uwarokotse Jenoside yakorewe Abatutsi mu 1994

- Ikiganiro cyo Kwibuka ku Nshuro ya 29 Jenoside yakorewe Abatutsi mu 1994

- Ubutumwa bwa Perezida w'Abafana ba APR FC mu Karere ka Musanze

- Kuremera abarokotse Jenoside yakorewe Abatutsi mu 1994 aho imiryango ibiri yaremewe umwe uhabwa ihene undi uhabwa ibiribwa.

IBINDI BIKORWA BY'INGENZI BYAKOZWE MU KARERE KURI UYU WA 18/06/2023

INAMA ZA DISTRICT DISASTER MANAGEMENT COMMAND POST

Uyu munsi mu Karere ka Ngororero hakozwe Inama za Disaster Management Command Post.

Inama ya mu gitondo yayobowe n'Umuyobozi w'Akarere Bwana NKUSI Christophe ari kumwe n'Umunyamabanga Uhoraho muri MININTER Bwana SESONGA Benjamin, District Reserve Force Commander Lt Col Donath BIKAGA, Umuyobozi w'Ingabo Maj Joseph RUHOGO, Umuhuzabikorwa wa DASSO Wungirije Ushinzwe Ibikorwa by'Umutekano n'Amakuru Telesphore MUNYANEZA n'Abakozi bashinzwe gukurikirana imirimo yo gusana inzu zangijwe n'ibiza mu Mirenge.

Iyi nama yize kandi ifata imyanzuro ku ngingo zikurikira:

- Kwemeza Ibibanza bizubakirwamo imiryango 255 yasenyewe n'ibiza

- Raporo ku migendekere y'ibikorwa byo gusana inzu 34 zangijwe n'ibiza

-Kubara ibikoresho by'inyongera ku mirimo yo kubaka

Mu myanzuro yafashwe muri iyi nama harimo iyi ikurikira:

- Gutegura ibisabwa byose kugirango ibibanza bizubakirwamo imiryango yasenyewe n'ibiza bibe byujuje ibisabwa byose ku buryo byakubakwaho nta nkomyi

- Gushyiraho amatsinda agomba gukurikirana umunsi ku munsi ibikorwa byo gusana inzu zangijwe n'ibiza

- Gukurikirana ko inzu ziri gusanwa zitari mu manegeka, aho byagaragara ko ziri mu manegeka imirimo yo kuvugurura igahagarara hagashakwa uko zabonerwa ibibanza kuri Sites z'Imidugudu

- Kwihutisha igikorwa cyo kubara ibikoresho by'inyongera bizafasha mu kurangiza imirimo yo kuvugurura inzu zangijwe n'ibiza.

Nyuma y'inama hakurikiyeho gusura imirenge ya Ngororero, Muhororo, Hindiro na Kabaya mu rwego rwo gukurikirana imirimo yo kuvugurura inzu zangijwe n'ibiza.

Inama ya nimugoroba yakozwe hifashishijwe uburyo bwa WebEx harebwa aho imirimo yo kuvugurura inzu zangijwe n'ibiza igeze, Progress y'ibikorwa byo kugena ingano z'ibikoresho by'inyongera no Gupanga uburyo bwo Gukurikirana no kwihutisha imirimo yo gusana inyubako zangijwe n'ibiza.

GUKURIKIRANA IBIKORWA BYO KUVUGURURA INZU ZANGIJWE N'IBIZA

Uyu munsi Abagize District Disaster Management Command Post bigabanyijemo amatsinda basura imirenge itandukanye hagamijwe gukurikirana ibikorwa byo kuvugurura inzu zangijwe n'ibiza.

 Umuyobozi w'Akarere Bwana NKUSI Christophe yasuye Umurenge wa Muhororo

- Umunyamabanga Uhoraho muri MININTER Bwana SESONGA Benjamin yasuye Umurenge wa Kageyo

- District Reserve Force Commander Lt Col Donath BIKAGA ari kumwe n'Umuhuzabikorwa wa DASSO Wungirije Ushinzwe Ibikorwa by'Umutekano n'Amakuru Telesphore MUNYANEZA basuye Imirenge ya Hindiro na Kabaya.

Ahasuwe hose hatanzwe inama zitandukanye zizafasha mu kwihutisha imirimo yo kuvugurura inzu zangijwe n'ibiza ku buryo zizaba zuzuye bitarenze kuwa 27/06/2023.

ISUZUMA KU ISHYIRWA MU BIKORWA RY'IMIHIGO YO GUKEMURA HUMAN SECURITY ISSUES

Uyu munsi abagize District Human Security Taskforce bigabanyijemo amatsinda basura imwe mu Mirenge igize Akarere ka Ngororero mu rwego rwo gukurikirana ishyirwa mu bikorwa ry'imihigo yo gukemura ibibazo bibangamiye imibereho myiza y'abaturage (Human Security Issues).

Amatsinda yasuye Imirenge mu buryo bukurikira:

Umuyobozi w'Akarere Bwana NKUSI Christophe ari kumwe n'Umuyobozi w'Ishami ry'Ubuzima mu Karere Bwana NYIRIMPUHWE Jean d'Amour basuye  Umurenge wa Ngororero,

 Umuyobozi w'Akarere Wungirije Ushinzwe Iterambere ry'Ubukungu Bwana UWIHOREYE Patrick ari kumwe na SSP Faustin MUHIZI na DCI RIB UWAMAHORO Joselyne basuye Umurenge wa Hindiro,

 Umuyobozi w'Akarere Wungirije Ushinzwe Iterambere ry'Imibereho Myiza y'Abaturage Madamu MUKUNDUHIRWE Benjamine ari kumwe na Ag DPCEO S/Sgt NIYITEGEKA JMV basuye Imirenge ya Nyange na Gatumba,

 Umuyobozi w'Ingabo Maj Joseph RUHOGO ari kumwe n'Umuyobozi wa One Stop Center mu Karere basuye Umurenge wa Muhororo,

 Umuhuzabikorwa wa DASSO mu Karere Damascene SAKINDI ari kumwe n'Umukozi w'Akarere Ushinzwe Ubugenzuzi bw'Inyubako basuye Umurenge wa Kavumu,

 Umuhuzabikorwa wa DASSO Wungirije Ushinzwe Ibikorwa by'Umutekano n'Amakuru Telesphore MUNYANEZA yasuye Umurenge wa Kageyo,

 Umukozi w'Akarere Ushinzwe Amazi n'isukura yasuye Umurenge wa Matyazo.

Ibyakozwe mu gusura Imirenge ni ibi bikurikira:

- Kureba Presentation igaragaza aho Imirenge igeze mu mihigo ya HSIs

- Kureba raporo n'izindi nyandiko zirebana n'imihigo ya HSIs

- Gusura ibikorwa kuri field birimo inzu zubatswe, inzu zasanwe, ... harebwa ko ibiri muri raporo bihuye n'ibiri kuri field

- Gutanga inama ku byanozwa mu gukemura ibibazo bibangamiye imibereho myiza y'abaturage.