Uyu munsi Itsinda ry'Abadepite bo muri Komisiyo y'Ubumwe bw'Abanyarwanda, uburenganzira bwa muntu no kurwanya Jenoside riyobowe na  Hon. Uwamariya   Rutijanwa Marie Pelagie bari mu ruzinduko rw'akazi mu Karere ka Ngororero.
Baje kureba uko abarokotse Jenoside yakorewe Abatutsi mu 1994 batishoboye babayeho, uko serivisi bagenerwa (kwivuza, gufashwa kwikura mu bukene, kubona amacumbi meza, kurihirwa amashuli,... ) zibageraho, uko Ubuhamya bw'abarokotse Jenoside yakorewe Abatutsi bubungabunzwe, uburyo inzibutso za Jenoside yakorewe Abatutsi zibungabunzwe,
uko kubungabunga amateka no kurinda ibimenyetso bya Jenoside yakorewe Abatutsi byifashe, aho gahunda yo guhuza inzibutso za Jenoside yakorewe Abatutsi igeze.
Uru ruzinduko rubaye mu kwezi kwahariwe Ubumwe n'Ubudaheranwa bw'Abanyarwanda; baraboneraho kureba imikorere y'amatsinda y'Ubumwe n'Ubwiyunge mu nzego zose (abakuru, urubyiruko, mu mashuli, mu mirenge, mu tugari,..).

Zimwe mu mbogamizi zafatiwe ingamba: imibiri itaraboneka ngo ishyingurwe mu cyubahiro,
amwe mu mazu akeneye gusanwa no kubakwa bundi bushya.

Bumwe mu buvugizi basabwe:
-Kubaka inzibutso zijyanye n'igihe zirimo ibice bigaragaza amateka ya Jenoside yakorewe Abatutsi,
- Kongera inkunga y'ingoboka kuko ubushobozi bwo guhangana n'ibiciro ku masoko  bwagabanutse,
 -Gufasha by'umwihariko abagize ihungabana ry'igihe kirekire bakegerezwa abajyanama b'ihungabana bakabahora hafi,  
-Kubonera akazi urubyiruko kugira ngo rutavaho rwishora mu biyobyabwenge,
-Kwihutisha iyandikwa ry'amateka ya Jenoside yakorewe Abatutsi bitarenze uyu mwaka
Ku bibazo birenze ubushobozi bw'Akarere, abadepite bijeje ubuvugizi uko ubushobozi buzagenda buboneka.

Abadepite bakomeje uruzinduko basura urwibutso rwa Jenoside yakorewe Abatutsi rwa Ngororero' basobanurirwa amateka ajyanye narwo banareba uburyo rubungabunzwe. Bashoje uruzinduko basura imiryango y'abarokotse Jenoside yakorewe Abatutsi mu murenge wa Ngororero' baganira ku mibereho yabo ya buri munsi (inkunga y'ingoboka, kwivuza, uburezi, ihungabana, amacumbi,...) Abagenerwabikorwa bifuje ko haboneka abajyanama b'ihungabana  mu buryo buhoraho bagahora hafi abafite ihungabana.