Kuri uyu wa10/04/2024 mu Karere ka Ngororero hakomeje ibikorwa byo Kwibuka ku Nshuro ya 30 Jenoside yakorewe Abatutsi mu 1994.

Ibi bikorwa byakomereje ku Rwibutso rwa Jenoside yakorewe Abatutsi mu 1994 rwa Ngororero ruherereye mu Murenge wa Ngororero aharuhukiye inzirakarengane 8.477.

Uru rwibutso ruri hamwe n'icyahoze ari ingoro ya MRND yatwikiwemo imbaga y'Abatutsi bazira uko baremwe.

Ibyaranzwe igikorwa:

-Gufata umunota wo kwibuka;
-Isengesho;
-Ijambo ry'ikaze no kugaragaza amateka ya Jenoside yakorewe Abatutsi mu 1994 mu Karere ka Ngororero by'umwihariko mu murenge wa Ngororero;
- Gusura urwibutso rwa Jenoside yakorewe Abatutsi mu 1994 rwa Ngororero no gushyira indabo ahashyinguye mu cyubahiro inzirakarengane zazize Jenoside yakorewe Abatutsi mu 1994;
-Ikiganiro kijyanye no kwibuka ku nshuro ya 30 Jenoside yakorewe Abatutsi mu 1994 cyatanzwe na MUTWARANGABO Innocent;

-Ubuhamya bwatanzwe na Rurangwa Appolinaire wavuze ku nzira y'umusaraba yanyuze we na bagenzi be bahigwagwa n'abicanyi, ashimira ingabo zatumye barokoka Jenoside yakorewe Abatutsi. Yashimiye ubuyobozi bwiza bw'Igihugu cyacu bwatumye biyubaka ubu bakaba batanga umusanzu ukomeye mu iterambere ry'u Rwanda.

Perezida wa Ibuka mu Karere yashimiye abarokotse Jenoside yakorewe Abatutsi uburyo banze guheranwa n'agahinda bakaba bageze aheza biyubaka.
Yagarutse ku nzitizi abarokotse Jenoside yakorewe Abatutsi bagihura nazo nk'imanza z'inkiko gacaca zitararangizwa, amacumbi y'abarokotse Jenoside yakorewe Abatutsi ashaje, ubushomeri mu rubyiruko.
Yasabye ko urwibutso rwa Ngororero rwavugururwa kuko rutakijyanye n'igihe.

Guverineri w'Intara y'Iburengerazuba Dr Dushimimana Lambert yihanganishije abarokotse Jenoside yakorewe Abatutsi, asaba buri wese kugendera kuri ingengabitekerezo ya Jenoside  kandi ko kurwanya abahakana n'abapfobya Jenoside yakorewe Abatutsi bigomba kuba inshingano ya buri wese by'umwihariko urubyiruko.
Guverineri Dushimimana yashimiye ubuyobozi bwiza bw'Igihugu cyacu bwubatse u Rwanda rushya ruzira amacakubiri rwuje ituze n'amahoro bituma abarutuye babayeho neza kandi rukagendwa n'abanyamahanga.
Yavuze ko impungenge zagaragajwe na perezida wa Ibuka zigomba kubonerwa ibisubizo izisaba ubushobozi buri hejuru zikazakomeza gukorerwa ubuvugizi.

Igikorwa cyitabiriwe kandi na Hon. Senateri Innocent SEBUHORO, Hon  Depite MANIRARORA Annoncée, Hon Depite NYABYENDA Damien, Hon Depite UWINEZA Beline, Rtd Major Gen Jack NZIZA, Perezida w'Inama Njyanama y'Akarere Madamu NYIRAMASENGESHO Jeannette ari kumwe na bamwe mu bajyanama mu Nama Njyanama y'Akarere, Umuyobozi w'Akarere Bwana NKUSI Christophe n'Abayobozi b'Akarere bungirije bombi, Perezida wa IBUKA mu Karere Bwana NTAGISANIMANA Jean Claude, Perezida wa AVEGA mu Karere Madamu KANGABE Appolinarie, abayobozi n'Inzego z'Umutekano zikorera mu Karere, Abanyamabanga Nshingwabikorwa b'Imirenge, Perezida wa JADF-ISANGANO Abbé Jean Paul Rutakisha, umuyobozi wa RIC mu Karere Abbé Ntirandekura Gilbert, abakozi b'Akarere n'abafatanyabikorwa batandukanye.