Ibikorwa byo wibuka ku nshuro ya 30 Jenoside yakorewe Abatutsi mu 1994 byakomereje  ku rwibutso rwa Jenoside yakorewe Abatutsi rwa Kibilira mu Murenge wa Gatumba.
Igikorwa  cyatangiriye ku rwibutso rwa Cyome ku mugezi wa Nyabarongo aho inzirakarengane bishwe bakarohwa muri uwo mugezi,  cyakomereje ku bitaro bya Muhororo ahunamiwe abakozi b'ibitaro , abarwayi n'abarwaza biciwe muri ibi bitaro bazira uko baremwe.
Igikorwa cyashoreje ku rwibutso rwa Jenoside yakorewe Abatutsi mu 1994 rwa Kibilira aharukiye inzirakarengane bagera ku 24,728.

Hateraniye imbaga y'abantu b'ingeri zose: Abajyanama mu Nama Njyanama y'Akarere, Komite Nyobozi y'Akarere, abayobozi b'inzego z'umutekano, abayobozi b'amadini n'amatorero, abihaye Imana, imiryango y'abafite ababo baruhukiye mu rwibutso rwa Kibirira, abaroshywe mu mugezi wa Nyabarongo, abaciwe mu bitaro bya Muhororo.
Hari kandi abaturage b'umurenge wa Gatumba n'abavuye mu mirenge bihana imbibi.
Umushyitsi mukuru yari Hon. Ndangiza Madina.
Ubuhamya bwatanzwe bwagaragazaga ubwicanyi ndengakamere bwabaye mu cyahoze ari Kibirira, inzira y'umusaraba abahigwaga banyuze, ubutwari bwabaranze bahangana n'ibitero by'abicanyi bakabisubiza inyuma. Nyuma bakaza kuganzwa n'ibitero by'abicanyi byatangatanze impande zose.

Umutangabuhamya Dusabyimana Alexia yavuze uburyo yaje kuzinukwa kubaho ariko yanga guheranwa n'agahinda aza gufata icyemezo cyo gushaka imibereho, yubaka umuryango, ubu akaba arera abana be n'imfubyi.
Yashimiye ubuyobozi bwiza bw'Igihugu cyacu, ingabo zahagaritse Jenoside, abavandimwe n'inshuti bagize uruhare mu kwiyubaka kwe n'abandi barokotse Jenoside yakorewe Abatutsi.
Perezida wa Ibuka nawe yashimiye ubuyobozi bwiza bw'Igihugu cyacu budahwema guharanira iterambere ry'abanyarwanda bose nta vangura.
Yagarutse ku bibazo abarokotse Jenoside yakorewe Abatutsi bagihura nabyo nk'imanza z'inkiko gacaca zitararangizwa, amacumbi y'abarokotse Jenoside yakorewe Abatutsi ashaje, inkunga y'ingoboka idahagije, inzibutso za Jenoside yakorewe Abatutsi zitakijyanye n'igihe zikeneye kuvugururwa.
Umushyitsi mukuru Hon Ndangiza Madina yahumurije abarokotse Jenoside yakorewe Abatutsi agira ati "muhumure Jenoside ntizongera kubaho ukundi, ubu dutuye igihugu cyuje umutekano giharanira iterambere ry'abanyarwanda bose, cyita ku banyantege nke barimo abarokotse Jenoside yakorewe Abatutsi batishoboye."
Yanenze ubuyobozi bubi bwaranzwe n'amacakubiri yoretse imbaga y'inzirakarengane. Aha yavuze ku mbwirwaruhame y'umunyapolitiki Leon Mugesera yakongeje ubwicanyi ndengakamere bugahitana imbaga y'Abatutsi mu cyahoze ari komini Kibirira izwiho kuba yarageragerejwemo Jenoside mbere ya 1994.

Yagarutse ku bibazo perezida wa Ibuka yakomojeho yizeza ko ibisubizo bitazatinda kuboneka uko ubushobozi buzagenda buboneka.
​