Icyumweru cy'icyunamo n'iminsi 100 yo kwibuka ku nshuro ya 30 Jenoside yakorewe Abatutsi mu 1994 gikomereje ku rwibutso rwa Jenoside yakorewe Abatutsi rwa Kesho mu murenge wa Muhanda aharuhukiye inzirakarengane 2500.
Insanganyamatsiko  iragira iti:"KWIBUKA TWIYUBAKA".
Urwibutso rwa Kesho ruri ku gasozi kari kahungiyeho abatutsi baranzwe n'ubutwari birukana ibitero by'abicanyi nyuma banza kuganzwa n'uko bagabweho igitero n'abasirikare bari barinze guverinoma y'abatabazi bakabicisha amasasu.

Ibyaranze umunsi:

-Gufata umunota wo kwibuka;
-Kunamira inzirakarengane hashyirwa indabo ku rwibutso no gusura urwibutso;
- Ikiganiro kijyanye no kwibuka kivuga amateka y'ibihe bikomeye byaranze isenyuka ry'umuryango nyarwanda cyatanzwe na UWIZEYE Jean de Dieu waturutse muri Association Modeste et Innocent (AMI);
- Ubuhamya bw'uwarokotse Jenoside yakorewe Abatutsi ;
-Ijambo rya Perezida wa IBUKA;
- Indirimbo zijyanye no Kwibuka zaririmbwe n'umuhanzi NTEZIRYAYO Innocent uzwi ku izina rya RWEMA;
-Ijambo ry'Umuyobozi w'Akarere.

Umutangabuhamya Havugimana Songa yagarutse ku mateka y'agasozi ka Kesho, ubutwari bwaranze Abatutsi bari bagahungiyeho, uburyo birwanyeho bakirukana ibitero by'abicanyi nyuma bakaza kwicwa mu bitero bagabweho n'abasirikare bari barinze guverinoma y'abatabazi yari yahungiye mu ruganda rw'icyayi rwa Rubaya.
Yagarutse ku nzira y'umusaraba Abatutsi banyuze ubwo bahigwaga n'abicanyi. Imbaga y'Abatutsi bishwe bajugunywe mu mugezi wa Giciye uri hafi ya Kesho. Yasabye ko hashyireaho in

Yashimiye ingabo z'u Rwanda zarokoye abahigwaga, ashimira ubuyobozi bwiza bw'Igihugu cyacu buharanira iterambere ry'abanyarwanda nta vangura.

Perezida wa Ibuka mu Karere Bwana Ntagisanimana Jean Claude nawe yashimiye ubuyobozi bwiza bw'Igihugu cyacu bukora ibishoboka kugirango imibereho myiza y'abarokotse Jenoside yakorewe Abatutsi irusheho kuba myiza. Yasabye ko ibikibangamiye ubumwe n'ubwiyunge nk' imanza z'inkiko gacaca zitararangizwa byava mu nzira. Yasabye ko ikibazo cy'ubushomeri mu rubyiruko cyabonerwa umuti urambye.
Yashimiye abarokotse Jenoside yakorewe Abatutsi banze guheranwa n'agahinda ubu bakaba bageze ahashimishije biyubaka.
Yavuze ko kwibuka ari inkingi ikomeye yo kwiyubaka no gushimangira ubumwe n'ubwiyunge.


Umuyobozi w'Akarere Bwana Nkusi yasabye abaturage gukomeza kugendera kure icyatoneka inkovu z'abarokotse Jenoside yakorewe Abatutsi, bagaca ukubiri n'ingengabitekerezo ya Jenoside, bakamaganira kure abayipfobya n'abayihakana.

Yibukije ko "tugomba gukomeza kuba hafi abarokotse Jenoside yakorewe Abatutsi, tukabafata mu mugongo mu kururutsa intimba bafite ku mutima."

Ibyifuzo by'umutangabuhamya byo gushyira monument kuri wa mugezi wa Giciye, kurangiza imanza z'inkiko gacaca; Meya Nkusi yavuze ko bikurikiranirwa hafi kandi ko ibisubizo bitazatinda kuboneka. Urwibutso rwa Kesho ntabwo ruzahuzwa n'izindi ruzahama aho ruri ubu.

Iki gikorwa cyitabiriwe kandi na Komite Nyobozi y'Akarere, abajyanama mu nama Njyanama y'Akarere, abayobozi b'inzego z'umutekano zikorera mu Karere,  presidente wa AVEGA ku rwego rw'Akarere, abayobozi b'ibitaro, ab'amadini n'amatorero, abayobozi n'abaturage b'umurenge wa Muhanda.