Mu mirenge igize Akarere ka Ngororero hatangijwe icyumweru cy'icyunamo n'iminsi 100 yo kwibuka ku nshuro ya 30 Jenoside yakorewe Abatutsi mu 1994.
Insanganyamatsiko  igira iti:"KWIBUKA TWIYUBAKA".

Ku rwego rw'Akarere icyumweru cy'icyunamo n'iminsi 100 yo kwibuka ku nshuro ya 30 Jenoside yakorewe Abatutsi mu 1994 cyatangirijwe ku rwibutso rwa Jenoside yakorewe Abatutsi rwa Kabaya ruherereye mu Murenge wa Kabaya aharuhukiye inzirakarengane 205.

Aha ku Kabaya niho umunyapolitiki Leon Mugesera yavugiye imbwirwaruhame rutwitsi avuga ko "Abatutsi bagomba kwicwa bagasubizwa muri Abisiniya banyuze iy'ubusamo bajugunywe mu mugezi wa Nyabarongo." Bityo aba atije umurindi ubwicanyi bwarimbuye imbaga y'abatutsi mu murenge wa Kabaya.

Ibyaranze umunsi:

-Gufata umunota wo kwibuka;
-Kunamira inzirakarengane hashyirwa indabo ku rwibutso no gusura urwibutso;
- Ikiganiro kijyanye no kwibuka kivuga amateka y'ibihe bikomeye byaranze isenyuka ry'umuryango nyarwanda cyatanzwe na UWIZEYE Jean de Dieu waturutse muri Association Modeste et Innocent (AMI);
- Ubuhamya bw'uwarokotse Jenoside yakorewe Abatutsi  MUKAMURENZI Béatrice;
-Ijambo rya Perezida wa IBUKA;
- Indirimbo zijyanye no Kwibuka zaririmbwe n'umuhanzi NTEZIRYAYO Innocent uzwi ku izina rya RWEMA;
-Ijambo ry'Umuyobozi w'Akarere;
- Gutega amatwi ijambo  Nyakubahwa Perezida wa Repubulika Paul KAGAME. yagejeje ku banyarwanda n'inshuti z'u Rwanda kuri uyu munsi twibuka ku nshuro ya 30 Jenoside yakorewe Abatutsi.

Umutangabuhamya Mukamurenzi Beatrice yagarutse ku nzira y'umusaraba Abatutsi banyuze ubwo bahigwaga n'abicanyi. Yashimiye ingabo z'u Rwanda zarokoye abahigwaga, ashimira ubuyobozi bwiza bw'Igihugu cyacu buharanira iterambere ry"abanyarwanda nta vangura.


Umuyobozi wa Ibuka mu Karere Bwana Ntagisanimana Jean Claude nawe yashimiye ubuyobozi bwiza bw'Igihugu cyacu bukora ibishoboka kugirango imibereho myiza y'abarokotse Jenoside yakorewe Abatutsi irusheho kuba myiza. Yasabye ko ibikibangamiye ubumwe n'ubwiyunge nk' imanza z'inkiko gacaca zitararangizwa byava mu nzira.Yashimiye abarokotse Jenoside yakorewe Abatutsi banze guheranwa n'agahinda ubu bakaba bageze ahashimishije biyubaka.

Umuyobozi w'Akarere Bwana Nkusi Christophe yijeje ko ibibazo Perezida wa Ibuka yavuze  bizabonerwa ibisubizo byihuse kuko ubuyobozi bw'Akarere bubizi kandi bubikurikiranira hafi.
Mayor Nkusi yasabye abaturage gukomeza kugendera kure icyatoneka inkovu z'abarokotse Jenoside yakorewe Abatutsi, bagaca ukubiri n'ingengabitekerezo ya Jenoside, bakamaganira kure abayipfobya n'abayihakana.
Iki gikorwa cyitabiriwe kandi na Komite Nyobozi y'Akarere, abajyanama mu nama Njyanama y'Akarere, abayobozi b'inzego z'umutekano zikorera mu Karere,  presidente wa AVEGA ku rwego rw'Akarere, abayobozi b'ibitaro, ab'amadini n'amatorero, abayobozi n'abaturage b'umurenge wa Kabaya.
Cyashojwe no gutega amatwi ijambo ry'umunsi Nyakubahwa Perezida wa Repubulika Paul Kagame yagejeje ku banyarwanda n'inshuti z'u Rwanda.