Ibikorwa byo kwibuka ku nshuro ya 32Jenoside yakorewe Abatutsi mu 1994 birakomeje mu Karere ka Ngororero.  Uyu munsi habaye igikorwa cyo kunamira inzirakarengane bishwe bakarohwa mu mugezi wa Nyabarongo ku rwibutso rwa Jenoside yakorewe Abatutsi mu 1994 rwa Cyome , abaforomo, abarwayi n'abarwaza biciwe mu bitaro bya Muhororo no kunamira inzirakarengane 24,729 baruhukiye mu rwibutso rwa Kibilira. Aha.hanashyinguwe mu cyubahiro imibiri 21 yabonetse. 
Abitabiriye iki gikorwa bakurikiye ikiganiro kijyanye no Kwibuka ku nshuro ya 32 Jenoside yakorewe Abatutsi mu 1994, ubuhamya bw'uwarokotse Jenoside yakorewe Abatutsi mu 1994, ubutumwa bw' Umuryango wa IBUKA n'ijambo rwa Guverineri w'Intara y'Iburengerazuba wari n'umushyitsi mukuru Bwana Ntibitura Jean Bosco.
Guverineri Ntibitura yahamagariye imbaga y'abitabiriye iki gikorwa kwamaganira kure ingengabitekerezo ya Jenoside. Yongeye gusaba akomeje uwo ari we wese waba azi aho imibiri y'inzirakarengane iiherereye kuherekana igashyingurwa mu cyubahiro.
Yihanganishije abarokotse Jenoside yakorewe Abatutsi mu 1994 anabashimira uburyo bakomeje gutwaza banga guheranwa n'agahinda.
Iki gikorwa cyitabiriwe kandi na Visi Perezida w'Urukiko rw'Ikirenga, bamwe mu badepite mu Nteko Ishinga Amategeko, abayobozi b'Inzego z'Umutekano ku rwego rw'Intara n'Akarere, intumwa ya Minubumwe, bamwe mu bajyanama mu Nama Njyanama y'Akarere, Komite Nyobozi y'Akarere, Meya w'Akarere ka Burera, Perezida wa IBUKA n'uwa AVEGA mu Karere, abahagarariye imiryango y'abiciwe ababo muri Jenoside yakorewe Abatutsi mu 1994, abayobozi n'abaturage b'umurenge wa Gatumba.