Mu Bitaro by'akarere bya Kabaya habereye igikorwa cyo kwibuka ku nshuro ya 32 Jenoside yakorewe Abatutsi mu 1994, hibukwa abaganga, abarwayi ndetse n’abarwaza biciwe muri ibi bitaro bazira uko bavutse.

Iki gikorwa cyitabiriwe n’Umuyobozi w’Akarere Bwana Nkusi Christophe ari kumwe n’abayobozi b’inzego z’umutekano zikorera mu Karere, abayobozi batandukanye ndetse n’abaturage b’Umurenge wa Kabaya.

Mu butumwa bwatanzwe, hibukijwe amateka y’ibyabereye mu Bitaro bya Kabaya mu gihe cya Jenoside yakorewe Abatutsi, havugwa ku bwicanyi ndengakamere bwakorewe inzirakarengane zari zahahungiye zizeye kurokoka.
Abatanze ubutumwa basabye abaturage gukomeza kwimakaza ubumwe bw’Abanyarwanda, kurwanya ingengabitekerezo ya Jenoside no gufata iya mbere mu bikorwa byo kubungabunga amateka no kwita ku barokotse Jenoside yakorewe Abatutsi.
Umuyobozi w'Akarere Bwana NKUSI Christophe 
wari umushyitsi mukuru yijeje abarokotse Jenoside yakorewe Abatutsi ubufatanye mu kubona amacumbi, gusana ayangiritse no kubafasha mu kibazo cyagaragajwe n'umwe mu barokotse  cy'imitungo y'abana barokotse Jenoside yakorewe Abatutsi ariko ikaba yarigaruriwe n'abandi bakaba batarayisubizwa.
Ibitaro bya Kabaya byaremeye inka umwe mu barokotse Jenoside yakorewe Abatutsi mu 1994.
Igikorwa cyaranzwe kandi n'urugendo rwaturutse ku bitaro bya Kabaya rwerekeza ku rwibutso rwa Jenoside yakorewe Abatutsi rwa Kabaya ahunamiwe inzirakarengane ziruhukiye mu rwibutso  hashyirwa indabo ku mva.