GS Muhororo yo mu Murenge wa Gatumba yizihije Yubile y'imyaka 75 imaze ishinzwe.
Uyu muhango witabiriwe n’abashyitsi batandukanye. Ubuyobozi bw’Akarere ka Ngororero bwari buhagarariwe n’Umuyobozi w’Akarere wungirije ushinzwe imibereho myiza y’abaturage, Madamu MUKUNDUHIRWE Benjamine.
Ku ruhande rwa Kiliziya, umushyitsi mukuru yari Musenyeri NSENGUMUREMYI Jean Marie Vianney wari uhagarariye Umushumba wa Diyosezi ya Nyundo.
Abayobozi b’inzego z’umutekano n’abandi bashyitsi benshi na bo bari bitabiriye, barimo abize muri iri shuri, abahoze ari abarimu baryo ndetse n’abayobozi baryo ba kera, bahagarariye abandi bose bagize amateka ya GS Muhororo.
Muri ibyo birori, hagaragajwe amateka y’iri shuri kuva ryashingwa kugeza ubu, ndetse n’ibikorwa by’indashyikirwa rimaze kugeraho mu myaka yose ishize.
Abanyeshuri bitwaye neza mu bizamini by’igihembwe cya kabiri by’umwaka w’amashuri wa 2025/2026 byateguwe ku rwego rw’Akarere, bashyikirijwe ibihembo kubera umusaruro mwiza bagize.
Abarimu n’abafatanyabikorwa b’ishuri nabo bashimiwe, harimo n’uwahoze ari umunyeshuri wahuje imbaraga z’abize muri iri shuri kugira ngo bafashe kubaka ibibuga bya Volleyball na Basketball.
Uyu mufatanyabikorwa kandi yatanze imipira ya Volleyball na Basketball abanyeshuri bazajya bakoresha kuri ibyo bibuga bishya byuzuye.
Ibirori byaranzwe n’imbyino gakondo n’imivugo byagaragazaga ibyishimo n’ishimwe mu kwizihiza Yubile y’imyaka 75 ishize GS Muhororo ishinzwe.
Umuyobozi w’Akarere wungirije ushinzwe imibereho myiza y’abaturage yashimye ubufatanye bwiza buri hagati y’Akarere na Kiliziya Gatolika ndetse n’ibikorwa byinshi bafatanyamo.
Hanatashywe ku mugaragaro ibyumba by’amashuri byavuguruwe ku bufatanye bw’Akarere na Diyosezi ya Nyundo, ndetse hanafungurwa ku mugaragaro ibibuga bya Volleyball na Basketball.