Guverineri w'Intara y'Iburengerazuba Bwana Habitegeko Francois yashoje uruzinduko rw'iminsi 2 yagiraga mu Karere ka Ngororero. Yarushoreje mu murenge wa Kageyo aho yitabiriye inteko y'abaturage abagaragariza ibyishimo atewe nuko asanze inkunga yo kwivana mu bukene bagenerwa n'umushinga Give Directly bayikoresha neza.

Atangira uruzinduko rwe muri aka karere kuwa 25/07/20222 yabanje kugirana inama na Bureau y'Inama Njyanama y'Akarere na Komite Nyobozi yako;
bungurana ibitekerezo ku mikorere n'imikoranire, iterambere ry'akarere n'imihigo y'umwaka w'ingengo y'imali wa 2022/2023.
Nyuma y'iyi nama yatanze ikiganiro  ku bwisungane mu kwivuza yageneye abanyamabanga nshingwabikorwa b'imirenge, abahagarariye inganda n'amakoperative. Yaberetse uburyo umuyobozi mwiza akora ubukangurambaga mu bo ayoboye bityo bakitabira gahunda za Leta ku bwende bwabo batagombye gusunikwa cyangwa kwibutswa.

 Aha yasabye abayobozi b'inzego zitandukanye gukora neza ku buryo abaturage babagirira icyizere gihagije bityo bakajya bishyura ubwisungane mu kwivuza batagombye kubyibutswa.
Ku munsi wa 2 w'uruzinduko rwe, Guverineri Habitegeko yifashishije ikoranabuhanga rya video conference atanga ikiganiro ku mihigo cyakurikiwe n'abayobozi b'inzego z'ibanze mu gihugu hose.

Yakomeje ajya gusura ahazubakwa ibitaro by'Akarere bya Muhororo. Ibi bitaro bimaze imyaka 70 byubatswe bikeneye inyubako nshya. Nyuma yo gusura sites 2 hakozwe inama yo guhitamo ahabereye kurusha ahandi hakubakwaho ibi bitaro Nyakubahwa Perezida wa Repubulika yemereye abaturage

Inama yahuje Guverineri n'intumwa za Minisiteri y'ubuzima, iz'ikigo cy'igihgu gishinzwe ingufu REG, icy'Amazi n'umutungo kamere, icy'ubucukuzi bw'amabuye y'agaciro RMB, icy'amazi,isuku n'isukura WASSAC,  Ngororero Mining Company n'iz' ikigo cy'Igihugu cy'ubutaka. Hari kandi abagize Biro y'Inama Njyanama y'Akarere, Komite Nyobozi, inzego z'umutekano, Umuyobozi mukuru  w'ibitaro bya Muhororo n'abandi batekinisiye mu buzima n'ubwubatsi. Nyuma yo kungurana ibitekerezo hashyizweho itsinda ryazasuzuma uko ibitaro byakubakwa kuri site yaba yegereye aho ibitaro bishaje byubatse mu murenge wa Gatumba.

Ku gicamunsi Guverineri yashoje uruzinduko rw'akazi yagiriraga mu karere ka Ngororero yitabira inteko y'abaturage mu kagari ka Mukore mu murenge wa Kageyo.
Aba baturage bafite umuterankunga  Give Directly ugenera buri rugo 821,000 frws yo kwivana mu bukene. Umunyambanga nshingwabikorwa w'umurenge wa Kageyo Bizimana Jean d'Amour yemeje ko iyi nkunga yatumye abaturage bakemura ibibazo bibangamiye nko kudatura heza, kugira imirire mibi n'igwingira, gucikisha amashuli kw'abana,.. Bwana Bizimana yagaragaje ko ingo zimaze kubona inkunga ari 4417, imiryango yihangiye imirimo (ubucuruzi, ubudozi, ububaji, soudure), indi ikagura imishinga y'ubucuruzi ni 331, ingo zaguze inka ni 915, ingo zaguze amatungo magufi (ihene, intama, ingurube) ni 629, ingo zaguze matelas  ni 846, ingo zaguze ibibanza ni 35, ingo zasannye amazu ni 105. Ingo zose zifite ubwiherero naho kwishyura ubwisungane mu kwivuza biri ku kigero cya 66,51%. Aha abaturage bemeje ko kuri 15/08/2022 bazaba bishyuye ubwisungane mu kwivuza 100%.

.Abaturage ubwabo bitangira ubuhamya bw'ibyo bamaze kugeraho.

Guverineri yabasabye ko ayo mafaranga yababera umugisha aho kubabera umuvumo akaba ibuye fatizo ryo gusezerera ubukene.
Yabasabye kwita mbere na mbere ku buzima bwabo bishyura ubwisungane mu kwivuza no kwizigamira muri Ejo Heza, gutura heza, kugira isuku haba mu ngo no ku mubiri.

Guverineri habitegeko mu kiganiro kirambuye yagiranye nabo yabashimiye uburo bakoresha neza inkunga bahawe yifatanya nabo gushimira Nyakubahwa Perezida wa Repubulika washyize umuturage kw'isonga. Abaturage bagaragaje ibyishimo byo kuba Umukuru w'Igihugu adahwema kubazirikana no kuba basuwe n'Umuyobozi w'Intara. Mu ndirimbo no mu midiho bagaragaje ko bakeye ku mutima bashimira ubuyobozi bwiza bw'Igihugu cyacu bwatumye batera intambwe igaragara mw'iterambere.