Kuri uyu wa kane tariki ya 5/03/2020 mu cyumba cy'inama cy'Akarere hatangijwe ku mugaragaro ibikorwa by'Umushinga RDDP (Rwanda Dairy Development Project). Umuhango wayobowe n'umuyobozi w'Akarere wungirije ushinzwe iterambere ry'ubukungu Bwana Uwihoreye Patrick ari kumwe n'umuyobozi w'umushinga Dr Ngarambe Michel.

 Nk' uko Bwana Ngarambe yabigaragaje, umushinga ugamije:
1. Guteza imibere ubworozi bw'inka zitanga umukamo,
2. Guteza imbere ibikorwa remezo n'ibikoresho bigamije gutunganya amata n'ibiyakomokaho (amakusanyirizo y'amata,  inganda n'amakaragiro),
3. Kunoza serivisi z'ubworozi ( gutera intanga, ubuvuzi bw'amatungo)
4. Gukemura ikibazo cy'ibura ry'ubwatsi n'amazi no kugabanya ibihombo aborozi haterwa n'imihindagurikire y'ikirere (inganda zikora iburyo by'amatungo, guhunika ubwatsi, gufata amazi,...)
5. Kunoza uburyo bwo gukusanya no gutwara amata.
Bwana Uwihoreye kimwe n'aborozi bari muri uyu muhango bagaragaje ikibazo cy'imihanda mibi ituma umusaruro w'amata utagerara ku gihe ku ruganda rwayo rwa Mukamira, ibura ry'amazi meza mu nzuri za Gishwati rituma abashumba batagira isuku haba ku mubiri cyangwa igihe bari gukama. Amahugurwa ku ba veterineri nayo arakenewe no gutunganya amakaragiro. RDDP yemeye kuzakemura bimwe ibyo idashoboye ikazabikorera ubuvugizi. Mu nzuri za Gishwati harabarurwa aborozi 152 bibumbiye muri koperative KAMU.

Nk'uko byavuzwe n'umuyobozi w'umushinga muri gahunda zayo harimo gushishikariza abanyarwanda kunywa amata. Yagize ati mu Rwanda harabarurwa aborozi 400,000 ariko kunywa amata ntibiragera ku rugero rusabwa. Ngo  umunyarwanda yagombye kunywa litiro 80 z'amata ku mwaka. Ubu ngo anywa litiro 68 gusa ku mwaka. Igihe FAO ivuga ko umuntu yagombye kunywa litiro120 ku mwaka naho OMS ikavuga litiro 200.

Umushinga ufite ingengo y'imari ya 65,068,100 z'amadorali. Mu myaka 3 umaze wakoresheje Umaze i48% byayo. Ukorera mu turere 14 ufite abagenerwabikorwa 100,000 b'imiryango ikennye. Ngororero yagiyemo  kubera ikora kuri Gishwati. Umushinga urateganya gushyigikira gahunda ya girinka hatangwa inka 6000. Mu bimaze kugerwaho mu myaka 3 ishize harimo guhugura abatekinisiye, gushyiraho amatsinda y'abafashamyumvire, kugeza amashanyarazi ku makusanyirizo, gutanga inka, kuvugurura ikigo gitunganya intanga no kongerera ubushobozi uruganda rutanga azote.
Ibizitabwaho mu Karere ka Ngororero: gutera inkunga imishinga igamije gutunganya amata , guhugura aborozi, gukora ubukangurambaga ku byiza byo kunywa amata, gushyira amazi mu nzuri za Gishwati . RDDP izatera inkunga imishinga y'ibyiciro binyuranye ijyanye n'ubworozi. Urubyiruko rufitemo amahirwe by'umwihariko.

Mu kungurana ibitekerezo Aborozi  bagaragaje ikibazo cy'amata menshi atagera ku makusanyirizo MCC. Hari kandi n"ikibazo cy'ibisabo bito n'ibicuba bike. Bakeneye kandi amahugurwa n'ibikoresho.  nk'uko byavuzwe na perezida w'aborozi bo mu nzuri za Gishwati Bwana mu kwezi kwa 2 bahombye 3,000,000 frws akomoka kuri litiro 20,000 yabyariwe.
Abayobozi b'ibigo by'imari bari muri iyi nama biyemeje gutanga inguzanyo ku bashaka gushora imari mu bworozi by'umwihariko amakoperative. RDDP nigera ku ntego, uretse guteza imbere ubworozi bizanafasha mu guhashya igwingira mu Karere ka Ngororero.

Uyu muhango witabiriwe n'aborozi, abayobozi b'ibigo by'imari, abanyamabanga nshingwabikorwa b'imirenge n'abakozi ba RDDP.