Umuganda rusange ngarukakwezi usoza uk'Ukwakira waranzwe no gutera ibiti hirya no hino mu mirenge igize Akarere ka Ngororero. 
Minisitiri w'Umutekano mu Gihugu akaba n'Imboni y'Akarere muri Guverinoma Hon. Visenti Biruta yifatanije n'abaturage b'Akarere ka Ngororero mu murenge wa Hindiro ,  mu Kagari ka Gatega, Umudugudu wa Kagarama kuri site ya Rucano
ahatewe ibiti bisanzwe bivangwa n'imyaka 3,929 n'iby'imbuto ziribwa 300 ku buso bungana na hegitari 14.
Igikorwa cyitabiriwe n'inzego zitandukanye harimo abagize Komite Nyobozi y'Akarere, abayobozi b'Inzego z'Umutekano zikorera mu Karere, abayobozi n'abaturage b'umurenge wa Hindiro.
Mu kiganiro yagiranye n'abitabiriye umuganda Minisitiri Biruta  yagarutse ku kamaro k'igiti mu buzima bwa buri munsi by'umwihariko iby'imbuto ziribwa bifasha mu kurwanya imirire mibi n'igwingira. 
Yasabye ko buri muryango wagira nibura ibiti 3 by'imbuto, ahatari ibiti hose bikahaterwa. Yashimiye abitabiriye umuganda kuba baje ari benshi landi bakeye abasaba gukomeza muri uwo mujyo.
Yagarutse ku isuku n'isukura bigomba kwimakazwa mu ngo zose bigaherekezwa no gukunda umurimo, kubaka umuryango ushoboye kandi utekanye wuje indangagaciro
nyarwanda bityo  "tugakomeza gukataza mu iterambere."
Abitabiriye umuganda bahawe ikaze n'Umuyobozi w'Akarere Bwana Nkusi Christophe washimiye ubuyobozi bwiza bw'Igihugu cyacu burangajwe imbere na Nyakubahwa Perezida wa Repubulika Paul Kagame buhora buzirikana iterambere ry'imibereho myiza y'abaturage.