Ngororero: Urugamba rwo kurandura imirire mibi rurakomeje

Habaye inama kuri Gahunda y’Akarere yo Kurandura Imirire Mibi, iyoborwa n’Umuyobozi Wungirije w’Akarere ushinzwe Imibereho Myiza y’Abaturage, Madamu MUKUNDUHIRWE Benjamine.
Ibiganiro byibanze ku isesengura ry’imiterere y’imirire mu Karere ka Ngororero, harebwa ibipimo by’imirire biriho birimo igwingira n’imirire mibi ikabije, imiterere y’ikorwa ry’amarerero y’abana bato (ECD), uruhare rwa gahunda ya Professional Umuganda mu kugabanya igwingira n’imirire mibi, aho ubukangurambaga bwa “Hehe n’Igwingira” bugeze, ndetse n’ibibazo bikigaragara bigira ingaruka ku mibereho n’imirire y’abaturage hamwe n’ingamba zo kubikemura.
Inama yafatiwemo imyanzuro y’ingenzi igamije kongerera imbaraga ishyirwa mu bikorwa rya Gahunda y’Akarere yo Kurandura Imirire Mibi, harimo:
Gukangurira ingo zose kugira uturima tw’igikoni no kudusigasira kugira ngo haboneke indyo yuzuye;
Gushishikariza ababyeyi kugira uruhare rugaragara mu myigire n’iterambere ry’abana babo bitabira amarerero y’abana bato (ECD);
Kwihutisha itangwa rya raporo z’ubukangurambaga bwa “Hehe n’Igwingira”;
Gukomeza no kunoza ishyirwa mu bikorwa ry’igikoni cy’umudugudu gikorwa buri kwezi;
Guteza imbere isuku n’isukura cyane cyane ahahurira abantu benshi n’ahakorerwa ibikorwa rusange;
Gushimangira gahunda yo gusura ingo hagamijwe gusuzuma imibereho yazo no gutanga ubufasha bukenewe mu rwego rw’imirire n’ubuzima;
Kongera ibikorwa byo gukangurira abaturage kwita ku buzima, imirire myiza no gukumira igwingira.
Iyi nama yitabiriwe n’abahagarariye inzego z’umutekano, World Vision, AEE Rwanda, Imbuto Foundation, Caritas Nyundo, abakozi bo mu rwego rw’ubuzima, abanyamabanga nshingwabikorwa b’imirenge, abayobozi b’ibigo nderabuzima, abashinzwe ubuzima n’isukura ndetse n’abashinzwe ubuzima bw’ibidukikije mu muryango (CEHOs).