Ngororero: Umuganura waranzwe no kwamagana inzoga zitujuje ubuziranenge

Mu karere ka Ngororero hizijijwe umunsi w'umuganura ku nsanganyamatsiko igira iti: "Umuganura, isoko y'Ubumwe n'ishingiro ryo kwigira".
Ku rwego rw'Akarere ibirori byabereye mu murenge wa Kageyo. Byabimburiwe n'imurika musaruro abaturage bagezeho wiganjemo uw'ubuhinzi ndetse no kugaburira abana indyo yuzuye. Abaturage bakurikiye ikiganiro mpaka ku nsanganyamatsiko y'umunsi no ku mateka. Ikiganiro cyatanzwe n'itsinda rigizwe 
n'umuyobozi w'Akarere,  uw'ingabo, Umujyanama mu nama Njyanama y'Akarere n'Umuyobozi w'ishuli.
Muri iki kiganiro hamaganywe inzoga zitujuje ubuziranenge,  ingaruka zazo ku buzima bw'abaturage no ku bukungu bw'igihugu
Hanavuzwe uburyo zihungabanya umutekano kandi ariwo musingi w'iterambere twifuza.
Muri iki kiganiro hanavuzwe ku ndangagaciro nyarwanda zirimo umuco wo kuganura, gusabana no gufashanya; abafite umusaruro mwinshi bagasaranganya n'abafite bike.
Umuyobozi w'Akarere yagarutse ku nsanganyamatsiko y'umunsi asaba abaturage gukomeza kurangwa n'umuco wo gufatanya, abafite byinshi bagasaranganya n'abafite bike, abishoboye bagasangira n'abanyantege nke.

Ibirori byitabiriwe n'Umuyobozi w'Akarere Bwana Nkusi Christophe ari kumwe n'abandi bagize Komite Nyobozi y'Akarere,  abajyanama mu Nama Njyanama y'Akarere,  abayobozi b'Inzego z'Umutekano zikorera mu Karere, bamwe mu bafatanyabikorwa nka ARCOS na Rising The Village, abayobozi n'abaturage b'umurenge wa Kageyo.