Ngororero: INAMA YO GUSUZUMA ISHYIRWA MU BIKORWA RY’UBUKANGURAMBAGA BWO KURWANYA IBINYOBWA N’IBIRIBWA BITUJUJE UBUZIRANENGE

Uyu munsi, hifashishijwe urubuga rwa WebEx, habaye inama yo kungurana ibitekerezo no gusuzuma aho ibikorwa by’ubukangurambaga bugamije kurandura ibinyobwa bisindisha n’ibiribwa bitujuje ubuziranenge bigeze bishyirwa mu bikorwa.

Iyo nama yayobowe n’Umuyobozi w’Akarere ka Ngororero, Bwana NKUSI Christophe, yitabirwa n’abagize Komite Nyobozi y’Akarere, abayobozi b’inzego z’umutekano ku Karere, Umuyobozi w’Ishami ry’Ubuzima, Abanyamabanga Nshingwabikorwa b’Imirenge, Abanyamabanga Nshingwabikorwa b’Utugari, ndetse n’abahagarariye inzego z’umutekano ku rwego rw’Imirenge.

Muri iyo nama, hasuzumwe aho ibikorwa byari bigeze ku munsi wa kane w’ubukangurambaga, hibandwa ku byagezweho, imbogamizi zagaragaye, ndetse n’ingamba zigamije kugera ku ntego zashyizweho mu gihe cyateganyijwe.

Abanyamabanga Nshingwabikorwa b’Imirenge bagejeje ku nama raporo z’ibyakozwe mu Mirenge bayobora, imbogamizi bahuye na zo, ndetse n’ingamba zafashwe kugira ngo zikemuke. Hanasuzumwe ibyavuye mu bikorwa byo kugenzura no gufata ibitemewe byakorewe mu Mirenge itandukanye mu rwego rwo gukumira ikorwa n’ikwirakwizwa ry’ibinyobwa bisindisha n’ibiribwa bitujuje ubuziranenge.

Imyanzuro n’ingamba zafatiwe muri iyo nama ni izi zikurikira:

▶️ Abayobozi b’Imirenge basabwe gushyiraho amatsinda akurikirana ishyirwa mu bikorwa ry’ubu bukangurambaga, hibandwa cyane cyane ku tubari dukorera mu bice by’icyaro;

▶️ Kongera imbaraga mu bugenzuzi no mu gufata ibinyobwa bisindisha bitujuje ubuziranenge kugira ngo ibikorwa biteganyijwe birangizwe mu gihe cyagenwe;

▶️ Gukomeza ibikorwa byo kugenzura no gufata ibitemewe mu bice byose byamaze gukorerwamo ibarura, hagamijwe ko nta bikorwa binyuranyije n’amategeko bisigara bidakurikiranwe;

▶️ Kurushaho gushimangira ubufatanye bw’inzego zose bireba kugira ngo ubu bukangurambaga bugamije kurengera ubuzima n’imibereho myiza by’abaturage bugere ku ntego zabwo.

Mu gusoza inama, Umuyobozi w’Akarere yashimiye inzego zose n’abafatanyabikorwa bagize uruhare mu bikorwa bimaze kugerwaho, anabasaba gukomeza kongera imbaraga kugira ngo ibinyobwa bisindisha n’ibiribwa bitujuje ubuziranenge bicike burundu mu Karere ka Ngororero.