Ngororero: Ibibazo bikibangamiye imibereho myiza y'abaturage bikomeje gushakirwa ibisubizo

Habaye inama y'Itsinda rishinzwe gukurikirana ibibazo bikibangamiye mibereho myiza y'abaturage (HSI), iyobowe n'Umuyobozi w'Akarere wungirije, Bwana BAHIZI Emmanuel, afatanyije n'abayobozi b'inzego z'umutekano zikorera mu Karere 
Iyi nama yasuzumye aho ishyirwa mu bikorwa ry'imihigo ya HSI y'umwaka w'ingengo y'imari wa 2026/2027 rigeze, inafata imyanzuro igamije kwihutisha ishyirwa mu bikorwa ry'ibikorwa biteganyijwe.
Inzego z'imirenge zasabwe kongera gusuzuma no gutanga raporo ku bibazo bya HSI bishobora kuba bitaragaragajwe mu igenamiterere ryabanje. Zanashishikarijwe kwihutisha kubaka no gusana amazu n'ubwiherero hakurikijwe gahunda y'ibikorwa yemejwe.
Abayobozi b'imirenge basabwe gutumiza mu nama zihariye zo gukangurira abaturage ba nyiri ingo badafite ubwiherero cyangwa bafite ubutari ku rwego rukwiye.
Akarere n'imirenge kandi byasabwe gukurikirana ibikorwa byo kwerekera abaturage uko bateka indyo yuzuye, no gutanga raporo igaragaza imidugudu yabikoze n'itabikoze.
Iyi nama yitabiriwe n'abahagarariye inzego z'umutekano, abayobozi b'ibitaro, abayobozi b'ishami ry'ubuzima, imibereho myiza, uburezi n'ubuhinzi, ushinzwe imicungire y'ibiza, ubugenzuzi bw'inyubako, Itorero n'uburere mboneragihugu, ndetse n'Umuyobozi wungirije w'Inama y'Igihugu y'Amadini n'Amatorero (RIC).