Skip to main content Skip to page footer
Urubuga rwemewe rwa Leta y’u Rwanda
Coat of arms of RwandaAkarere ka Ngororero

Ngororero: Abahinzi basabye ubufasha bwo kuhira (irrigation) mu gishanga cya Songa

10 October 2026

Minisitiri w'Umutekano mu Gihugu akaba n'Imboni y'Akarere ka Ngororero  muri Guverinoma Hon. Visenti Biruta yifatanije n'abaturage b'aka Karere mu gutangiza ku mugaragaro igihembwe cy'ihinga 2027A. Igikorwa cyabereye mu murenge wa Nyange mu cyanya kigega (FOBASI)  cya Songa ya mbere ahatewe imbuto y'ibigori kuri hegitari 40.
Abahinzi  bafite akanyamuneza batewe n'uko iki gikorwa kibaye haraye haguye imvura nyinshi ubutaka bukaba bwasomye.
Mw'izina rya bagenzi umuhinzi Nzeyimana Etienne yavuze ku mpinduka nziza ubuhinzi bwa kijyambere bwagize ku muturage  harimo kunoza imirire, kwiteza imbere no gusagurira amasoko.
Yashimiye ubuyobozi bwiza bw'Igihugu cyacu butanga nkunganire haba ku mbuto haba ku mafumbire umusaruro ukarushaho kwiyongera. Yifuje ko haboneka urugomero rw'amazi (dam) mu gishanga cya Songa ku buryo abahinzi bajya buhira mu gihe cy'impeshyi muri season C.
Umunyamabanga uhoraho muri Minisiteri y'ubuhinzi n'ubworozi Bwana Olivier Kamana yagarutse ku mihindagurikire y'ikirere yibutsa abahinzi gukomeza kwitegura imvura nyinshi y'umuhindo barwanya isuri ahantu hose.
Yashimiye ubuyobozi bwiza bw'Igihugu cyacu bwakoze ibishoboka kugirango ifumbire iboneke kandi ku gihe bityo umuhinzi akaba atekanye. Yibukije abahinzi  gushyira ibihingwa n'amatungo mu bwishingizi. 
Mu ijambo yagejeje ku bitabiriye iki gikorwa Minisitiri Biruta yasabye abahinzi guharanira kongera umusaruro kuko "ibyangombwa byose bihari"
Yasabye abayobozi guhora hafi abahinzi kugirango umusaruro wabo woye kwangirika kandi ubonerwe isoko.
Minisitiri Biruta yagarutse ku mutekano avuga ko ibinyobwa bitujuje ubuziranenge byawuhungabanyaga ko bigomba gucika burundu. Yanavuze ku ngaruka nziza zo kuba "inzoga z'ibyuma" zaraciwe mu Rwanda: urugomo rwaragabanutse, amakimbirane mu miryango azakendera, imirire myiza iriyongera,...
Igikorwa cyitabiriwe n'intumwa za RAB, Komite Nyobozi y'Akarere,  abayobozi b'Inzego z'Umutekano zikorera mu Karere,  abayobozi n'abaturage b'umurenge wa Nyange.

Back