Ngororero: abacukura kariyeri bibukijwe kubungabunga ibidukikije

Habaye inama yahuje abafite impushya zo gucukura kariyeri, igamije kubasobanurira amategeko n'amabwiriza agenga ibikorwa byo gucukura kariyeri. Intego y'iyi nama yari ugusobanura ko ibikorwa byo gucukura kariyeri bigomba gukorwa hubahirizwa amategeko n'amabwiriza abigenga, hagamijwe no kurengera no kubungabunga ibidukikije. Abitabiriye inama kandi bibukijwe inshingano zabo zo kwishyura imisoro n'amahoro byose biteganywa n'amategeko, harimo n'umusoro w'ubukode bw'ubutaka bukoreshwa na kariyeri, hakurikijwe imyanzuro y'Inama Njyanama y'Akarere ka Ngororero.
Nyuma y'ibiganiro no kungurana ibitekerezo, hemejwe imyanzuro ikurikira:
- Amafaranga y'ubwikorezi bw'ibikoresho bicukurwa muri kariyeri azajya yishyurwa n'ubigura.
- Umusoro w'ubukode bw'ubutaka bukoreshwa na kariyeri uzajya wishyurwa na nyiri kariyeri, kandi ingano yawo izagenwa hashingiwe ku bwinshi bw'ibikoresho bipakirwa kuri buri kinyabiziga.
- Abakora ibikorwa byo gucukura kariyeri bagomba kubahiriza amategeko n'amabwiriza yose agenga uwo murimo no kurinda, kubungabunga no gukoresha ibidukikije mu buryo burambye.
Mu nama itaha hazatorwa abagize Komite y'Akarere ishinzwe ibikorwa bya kariyeri, izakorana bya hafi n'Ubuyobozi bw'Akarere mu bugenzuzi no gukurikirana ibikorwa byo gucukura kariyeri.
Hazashyirwaho itsinda rya WhatsApp rizafasha koroshya itumanaho no guhanahana amakuru hagati y'abafite impushya zo gucukura kariyeri n'Ubuyobozi bw'Akarere.
Iyi nama yayobowe n'Umuyobozi w'Akarere ka Ngororero wungirije ushinzwe Iterambere ry'Ubukungu, Bwana UWIHOREYE Patrick. Yitabiriwe kandi n'Umunyamabanga Nshingwabikorwa w'Akarere, Bwana BAHIZI Emmanuel, abayobozi b'Inzego z'Umutekano ndetse n'uhagarariye Ikigo cy'Igihugu cy'Imisoro n'Amahoro (RRA), Bwana KAYIGAMBA Jacques.