AKARERE KA NGORORERO KAGIYE GUSHYIRA MU BIKORWA UMUSHINGA M-GA UZAFASHA IMIRYANGO KWITEZA IMBERE

Akarere ka Ngororero kagiranye inama ibanziriza ishyirwa mu bikorwa ry'umushinga wa Multi-Partner Global Accelerator (M-GA), uzashyirwa mu bikorwa n'Ikigo gishinzwe Iterambere ry'Inzego z'Ibanze (LODA), ku bufatanye na gahunda y'Umuryango w'Abibumbye yita ku Biribwa (WFP) ndetse n'umuryango Food for the Hungry (FH).
Uyu mushinga uzatwara amafaranga y'u Rwanda 321.750.935 Frw, ukazashyirwa mu bikorwa binyuze mu mirimo rusange idaheza, ishingiye ku kurengera ibidukikije no guhangana n'imihindagurikire y'ibihe (Climate-Smart Public Works – cSPW), mu Mirenge ya Hindiro na Matyazo.
Ugambiriye guha imirimo y'igihe gito no gufasha mu kongera ubushobozi bw'amikoro ingo zujuje ibisabwa, ari na ko uteza imbere ibikorwa byo guhangana n'imihindagurikire y'ibihe, kurengera ibidukikije no kubaka ibikorwa remezo birambye bifitiye akamaro abaturage.
Inama yayobowe n'Umuyobozi w'Akarere ka Ngororero w'agateganyo, Bwana BAHIZI Emmanuel, yitabirwa n'intumwa za LODA, WFP na FH, ziyobowe na Bwana RWAHAMA Jean Claude, Umuyobozi ushinzwe Imibereho Myiza y'Abaturage muri LODA, hamwe n'abayobozi n'abakozi b'Akarere bireba.
Iyi nama yabaye umwanya mwiza wo gusobanukirwa neza intego z'umushinga M-GA, uko uzashyirwa mu bikorwa n'inshingano za buri ruhande. Yanashimangiye ubufatanye  mu guhuza ibikorwa hagati y'inzego zose zifite uruhare muri uyu mushinga, hagamijwe kuwushyira mu bikorwa neza no kugeza ku miryango igenewe inyungu zawo.