Mu murenge wa Nyange ku gicumbi cy'Ubunyarwanda cy'Intwari z'IMENA z'abanyeshuli b'i Nyange habereye ibirori byo kwizihiza ubutwari bw'Intwari z'Igihugu ku rwego rw'Akarere ka Ngororero.
Umunyamabanga Nshingwabikorwa w'Intara y'Iburengerazuba Madame Uwambajemariya Florence ari kumwe n'abagize Komite Nyobozi y'Akarere, inzego z'umutekano, abanyeshuli n'abaturage b'umurenge wa Nyange bitabiriye kwizihiza ibi birori. Insangayamatsiko y'uyu munsi iragira iti: "Ubutwari n'Ubumwe bw'Abanyarwanda, inkingi z'iterambere."

Izi ntwari zashyizwe mu cyiciro cy'Imena ni abari abanyeshuri mu ishuri ryisumbuye rya Nyange mu 1997. Igihe bagabwagaho igitero n'abacengezi mu ijoro ryo kuwa 18 rishyira kuwa 19/03/1997  babasabye kwitandukanya
hakurikijwe ibyiswe ubwoko bw'Abahutu n'Abatutsi ariko bo baranga barasubiza bati: "Twese turi Abanyarwanda".
Bityo baba babibye imbuto ya Ndi Umunyarwanda ubu yinjiye mu mateka y'u Rwanda ndetse n'isi yose.

Mw'ijambo rye Umunyamabanga Nshingwabikorwa w'Intara y'Iburengerazuba Madame UWAMBAJEMARIYA Florence yagize ati "twese tube intumwa za Ndi Umunyarwanda duharanira gusigasira agaciro k'ubutwari bw'Intwari z'u Rwanda zaba izatabarutse zaba izikiriho." Avuga ku Ntwari z'IMENA z'abanyeshuli b'i Nyange Madamu Uwambajemariya yagize ati 
"Ubumwe bwabo nibwo bwatumye bashobora gutsinda abashakaga kubacamo ibice. Bemeye guhara ubuzima bwabo babiba imbuto ya Ndi Umunyarwanda. Muze twese, abato n'abakuru, tubigireho."
Ibirori byaranzwe no gusura inzu ibumbatiye amateka y'Intwari z'Imema z'abanyeshuli b'i Nyange, kunamira izi Ntwari  hashyirwa indabo ku gicumbi cyazo,  impanuro , imbyino, indirimbo n'imivugo byose byarataga ubutwari bw'aba banyeshuli babibye imbuto ya Ndi Umunyarwanda.