Mu karere ka Ngororero ibikorwa byo kwibuka ku nshuro ya 32 Jenoside yakorewe Abatutsi mu 1994 birakomeje. Uyu munsi igikorwa cyabereye ku rwibutso rwa Jenoside yakorewe Abatutsi mu 1994 rwa Nyange ahashyinguwe imibiri 12 yabonetse.
Jenoside yakorewe Abatutsi mu murenge wa Nyange yakoranywe ubugome bw'indengakamere aho Abatutsi bari bahungiye mu Kiliziya Gatolika ya Nyange bayirituriweho ku mabwiriza yatanzwe n'uwari Padiri mukuru wa Paroisse Nyange Seromba Athanase.
Igikorwa cyitabiriwe na Président wa Senat Hon. Dr Kalinda François Xavier wari umushyitsi mukuru. 
Mw'ijambo yagejeje ku mbaga y'abitabiriye kwibuka ku nshuro ya 32 Jenoside yakorewe Abatutsi mu 1994,  yavuze ko ubuyobozi bw'Igihugu butazahwema kuba hafi abarokotse, abashimira ubutwari bagaragaje bakanga guheranwa n'agahinda ahubwo bagaharanira iterambere rirambye.  Yavuze ko abagifite umugambi wo guca abanyarwanda mo ibice ntaho bazamenera kuko ubuyobozi bwiza bw'Igihugu cyacu burangajwe imbere na Nyakubahwa Perezida wa Repubulika Paul Kagame butabyihanganira na gato.
Yagarutse ku butwari bwaranze Intwari z'Imema z'abanyeshuli b'i Nyange asaba buri wese kubafariraho urugero. Banze kwitandukanya bakurikije amoko y'icyo gihe babisabwe n'abicanyi bari bateye iryo shuli barabatsembera bagira bati: twse turi abanyarwanda. 
Umunsi washojwe no gushyingura mu cyubahiro imibiri yabonetse no kunamira inzirakarengane ziruhukiye muri uru rwibutso rwa Jenoside yakorewe Abatutsi mu 1994 rwa Nyange.
Igikorwa  cyitabiriwe kandi na Visi Perezida w'umutwe w'abadepite, bamwe mu bagize Inteko Ishinga Amategeko imitwe yombi, abayobozi b'inzego z'Umutekano ku rwego rw'Intara n'Akarere, Perezida w'umuryango Ibuka ku rwego rw'Igihugu, abayobozi batandukanye,  imiryango y'ababuze ababo baruhukiye muri uru rwibutso, abaturage b'imirenge ihana imbibi n'uwa Nyange mu Turere twa Karongi na Ngororero. 
Bahawe ikaze n'Umuyobozi w'Akarere Bwana Nkusi Christophe.