Nyuma y'aho  Akarere ka Ngororero gahuye n'ibiza bidasanzwe byatewe n'imvura nyinshi bigahitana abantu 21, ibikorwa remezo nk'imihanda, ibiraro, amazi n'amashanyarazi bikangirika; Minisitiri w'Ubutegetsi bw'Igihugu Professeur SHYAKA Anastase yagiriye uruzinduko rw'Akazi muri aka Karere kuri uyu wa gatanu tariki 15/05/2020.

Nk'uko yabivuze yaje azanye ubutumwa bwo guhumuriza abaturage yahawe na Nyakubahwa  Perezida wa Republika Paul Kagame . Yagize ati: mukomere muhumure turi kumwe.
Yavuze ko yiboneye ko ibiza bikomeye kandi byangije byinshi ababwira ko azabaha umuganda kugira ngo bongere kwiyubaka.

Ikiraro gihuza imirenge ya Ngororero, Kageyo na Kavumu cyatwawe n'umugezi wa Satinsyi

Yashimiye abaturage uburyo bihutiye kuva ahashyira ubuzima bwabo mu kaga. Asaba abasigaye mu manegeka kuyavamo.  Yagize  ati: "ibintu ni ibishakwa icyingenzi ni ubuzima". Yanabashimiye uburyo bakumiye icyorezo  cya Coronavirus agira ati ni byiza ko mu Karere ka Ngororero nta numwe urandura iki cyorezo .
Yanashimiye ubuyobozi bw'Akarere uburyo bwitaye ku baturage bukabavana mu ngo hakiri kare ibiza bitarabahitana.  Yashimiye imikoranire myiza hagati y'abaturage n'abayobozi.
Abaturage nabo bashimiye Umukuru w'Igihugu uhora ubazirikana.  Banamushimiye kuba yaboherereje intumwa zo kubahumuriza mu ngorane barimo batewe n'ibiza. Bashimiye ubuyobozi bwiza  bwabitayeho.

Minisitiri Shyaka yashoje uruzinduko rwe yizeza abaturage ko ibyifuzo bamuhaye azabikorera ubuvugizi. Ati ubushobozi bwo kubafasha Igihugu kirabufite. Abafatanyabikorwa barahari  kandi bazasanga dufatanye urunana twiyubaka.
 Yakiriwe na guverineri w'Intara y'Iburengerazuba ari kumwe na Komite Nyobozi y'Akarere n'inzego z'umutekano.