Kuri uyu wa 21/11,2019 kuri Guest house y'Akarere habaye inama mpuzabikorwa y'ubuzima ku bufatanye n'umushinga INGOBYI Activities
Inama yatumiwemo inzego zinyuranye zirimo abayobozi bakuru b'ibitaro bya Kabaya na Muhororo, abayobozi b'ibigo nderabuzima, abanyamabanga nshingwabikorwa b'imirenge, abashinzwe imibereho myiza y'abaturage mu mirenge,abakozi b' ishami ry'ubuzima ku karere, inzego za CNF na CNJ, amadini n'amatorero n'abandi bose bafite aho buhuriye n'ubuzima bw'abaturage.

Muri iyi nama hatanzwe ibiganiro binyuranye harimo imihigo 2019/2020 y'ubuzima mu  karere, ibipimo by'ubuzima mu bitaro bya Muhororo na Kabaya.

VM Uwihoreye yasabye inzego gutahiriza umugozi umwe

Mu kungurana ibitekerezo abari mu nama basanze ibibazo byagaragaye bifite imizi ku mikoranire itanoze hagati y'ibigo nderabuzima n'ubuyobozi bw'inzego zibanze (umurenge, akagari ). Umuyobozi w'akarere wungirije ushinzwe iterambere ry'ubukungu Bwana Uwihoreye Patrick watangije iyi nama yasabye abayitabiriye gutahiriza umugozi umwe kugirango ubuzima bw’abaturage barusheho gusugira.

Ibigo nderabuzima byagaragayeho ibipimo byo hasi basabwe kurushaho kuzamura imyumvire y'abaturage bakitabira kuboneza urubyaro, kunoza imirire, kwipimisha ku batwite,... Abayobozi b'ibigo nderabuzima basabwe kwisuzuma buri munsi kugirango barangize neza inshingano zabo. Padiri mukuru wa paroisse ya Muhororo akaba anakuriye Forum y'amadini Rutakisha Jean Paul yasobanuye neza ko amadini ashyigikiye kuringaniza urubyaro ngo kuko kubyara abo udashoboye kurera ari ukubyara ingabo za shitani.

Padiri Rutakisha yavuze ko amadini atabangamiye kuringaniza urubyaro

 Umuyobozi mukuru w'ibitaro bya Muhororo Eddy Ndayambaje yerekanye neza ko kutaringaniza urubyaro ari gutiza umurindi imirire mibi n'igwingira ry'abana bato. Umukozi w'umushinga Ingobyi activities yagize ati  ubuzima bugomba kubungabungwa byimazeyo kuko ubuzima bwiza ari umusingi w'iterambere.

Mukeshimana Athanasie ushinzwe serivisi yo kuringaniza urubyaro, ubuzima bw'umwana n'umubyeyi n'ubuzima bw'imyororokere  mu bitaro bya Kabaya yatanze ubutumwa ku baje mu nama :
 1) Umugore wabyaye agomba gutekereza kongera kubyara nyuma y'imyaka 2 bivuga ngo uruhinja rwagira umunsi umwe uwo rukurikira afite imyaka 3. 2) Nta mwangavu ukwiye gutwita atarageza nibura ku myaka 18. Aha yavuze ko abangavu batwita batarageza igihe ni 7%. Gusa kandi ibyumba by'urubyiruko ngo ntibikora neza. 3)Gusobanurira ababyeyi ko imihango ibanzirizwa n'uburumbuke.  4)Umubyeyi wavanyemo inda agomba gutekereza kongera kubyara nibura hashize amezi 6. 4)Kirazira ko stock y'imiti yifashishwa mu kuringaniza urubyaro kimwe n'udukingirizo yashira muri Pharmacie y'Akarere.

Présidente w'inama y'igihugu y'abagore mu karere ka Ngororero Mme Kampire Christine yasabye ko urubyiruko rwakwitabwaho by'umwihariko mu bukangurambaga bwo kuboneza urubyaro kandi ibitsina bikavugwa mu mazina yabyo. Imana yarangiye abayitabiriye bafashe ingamba zo guhangana n'ibibazo bigahabwa ibisubizo.

                                         Abitabiriye inama biyemeje guhindura imikorere