Ku bufatanye bw'intara y'Iburengerazuba n'Ikigo cy'Igihugu cy'Imiyoborere myiza RGB n'Akarere ka Ngororero uyu munsi kuwa 26/02/2020  muri salle y'Akarere hateraniye inama yo kwigiranaho ku bijyanye n'igenamigambi hagati y'abafatanyabikorwa mw'iterambere ry'akarere JADF Isangano n'Akarere.  Inzego  zombi zemeranya ko umuturage ariwe pfundo mw'igenamigambi kandi afitemo uruhare binyuze mu mucyo.
 Inama yitabiriwe na perezida wa JADF Isangano na komite yayo, abaperezida ba komisiyo z'Inama Njyanama, abanyamabanga nshingwabikorwa b'imirenge bahagarariye abandi, n'abayobozi b'amashami ku Karere. Yayobowe n'umuyobozi w'Akarere Bwana NDAYAMBAJE Godefroid ari kumwe na coach wa Jadf ku Ntara y'Iburengerazuba Bwana Mugisha Theogène.

Bwana Mugisha yatanze ikiganiro kirambuye ku mikorere n'imikoranire ya  JADF naho umuyobozi w'Ishami ry'igenamigambi, ikurikirana n'isuzumamihigo Birolimana Jean Paul yavuze ku ngamba z'iterambere ry'Akarere DDS. Yagaragaje imihigo y'ingenzi Akarere kafatanyamo na Jadf n'ibikorwa abashoramari bakwibandaho.
Mayor NDAYAMBAJE yagarutse ku bufatanye hagati ya JADF n'Akarere yibutsa ko kizira ngo abafatanyabikorwa benshi bahurire ku    gutera inkunga ahantu hamwe mu gikorwa kimwe. Yongeye ko kuva aho JADF igerereye mu Karere iterambere ryiyongereye ku buryo bugaragara. Muri iyi nama hashatswe uburyo JADF n'Akarere bahuza imbaraga mu gufatanya imihigo iteza imbere abaturage irimo kurwanya igwingira nimirire mibi.
Mu mwaka w'ingengo y'imali 2018/2019 mu Karere ka Ngororero ibikorwa bya JADF byagize agaciro kangana na 2,617,647,029 frws. Muri 2019/2020  JADF iteganije igengo y'imari ingana 3,060,740,809 frws
Mu Karere ka Ngororero harabarurwa abafatanyabikorwa 44.