Umuyobozi w'Akarere wungirije ushinzwe Iterambere ry’Ubukungu, Bwana UWIHOREYE Patrick, yagiriye uruzinduko rw’akazi mu bikorwa bya sosiyete Ecoplanet Bamboo Rwanda Ltd byashyizwe mu bikorwa mu Karere ka Ngororero. Yasuye ibijyanye n’imishinga yo gusana no kurengera inkombe z’imigezi ndetse n’iyo guteza imbere imirire myiza y’abaturage ishyirwa mu bikorwa na Ecoplanet.
Muri urwo ruzinduko, Visi Meya Uwihoreye yasuye ibikorwa byo gusana inkombe z’imigezi byakozwe na Ecoplanet Bamboo Rwanda Ltd. Uwo mushinga umaze gusana hegitari zirenga 294 z’ahari inkombe z’imigezi mu Karere ka Ngororero haterwamo imigano mu byanya bigenewe kurinda imigezu n'inzuzi.
Imigano yatewe ku nkombe z’imigezi igira uruhare rukomeye mu:
- kurinda ubutaka bukikije inzuzi kwangirika no gutwarwa n’isuri;
- gukomeza no gukomera ku byanya bigenewe kurinda imigezi;
- gufasha mu guhangana n’imihindagurikire y’ibihe binyuze mu kugabanya imyuka ihumanya ikirere ikoresheje kwinjiza ogisijeni no kubika karuboni;
- gushyigikira gahunda ya ECD Imbuto igamije guteza imbere imirire myiza y’abana.
Visi Meya kandi yasuye ECD Imbuto iherereye mu Karere ka Ngororero, ifashwa na Ecoplanet mu guteza imbere imirire myiza y’abana no kurwanya imirire mibi.
Ubu bufasha bwashyizwe mu bikorwa binyuze mu kubaka inzu ihingwamo (grow house) mu Murenge wa Hindiro. Iyo nzu yashyizweho kugira ngo ifashe mu gutunganya no gutanga ibiribwa bifite intungamubiri, ndetse no guteza imbere ubuhinzi bw’ibihumyo (mushrooms).
Byongeye kandi, Ecoplanet yashyizeho gahunda yo korora iminyorogotwe y’ifumbire (vermiculture system), igira uruhare mu guteza imbere ubuhinzi burambye binyuze mu gutanga ifumbire mvange ikomoka ku bidukikije. 
Ibi bikorwa byaherekejwe n’amahugurwa yagenewe abaturage kugira ngo birambe no guteza imbere ihererekanyabumenyi mu miryango.
Uru ruzinduko  rwerekanye ko ubuyobozi bw’inzego z’ibanze bushyigikiye cyane ibikorwa bya Ecoplanet Bamboo Rwanda Ltd birimo kubungabunga inkombe z’imigezi, guteza imbere imirire myiza muri ECD Imbuto  nk’ibikorwa bifite akamaro kanini bikwiye gukomeza no kongererwa imbaraga kugira ngo bigire ingaruka zirambye mu iterambere ry’Akarere