Byavugiwe mu muhango wo guha inka 15 abagenerwabikorwa bazikeneye kurusha abandi mu kagari ka Nyange mu murenge wa Ngororero. Umuyobozi w'Akarere bwana Ndayambaje Godefroid yashimiye umufatanyabikorwa  Compassion Internationale watanze izi nka agaruka k'uruhare rwayo mu bikorwa iteramo inkunga akarere, byose bikora ku buzima bw'abaturage bibaherekeza mu rugendo rw'iterambere.

Yabashimiye imikorere n'imikoranire aho bunganira ibikorwa byumvikanyweho nko kugoboka abatishoboye itanga inka zihaka, guteza imbere uburezi no kunoza imibereho y'ingo.

Yashimiye by'umwihariko itorero rya EAR ku bikorwa bateramo inkunga Akarere mu kunoza ubuzima bwiza bw'abaturage. 

Mayor Ndayambaje yabwiye abaturage ko inka bahawe ari igihango bagiranye na Leta ndetse na Compassion Internationale ko bagomba kuzitaho zikabagirira akamaro. Yabasabye ko bazorora neza nabo bakazatangira ubuntu bafasha bagenzi babo kuva mu bukene.Yabibukije ko uwahawe inka agomba guhita ahindura imyumvire akava mu cyiro cy'ubukene (cat.1) akajya mu cyiciro cy'ubukire.

Compassion Internationale kandi  ifasha abana ibagobotora mu ngoyi y'ubujiji iberekeza ku mibereho myiza. Abana bose bafashwa baraherekezwa kugeza barangije Kaminuza. Compassion yiyemeje gukomeza gutera inkunga akarere;igasaba gukomanga  ngo kuko  amarembo arafunguye. Yiyemeje imikorere n'imikoranire irambye. Yasabye akarere ko bazungurana ibitekerezo ku bufasha bwahabwa abahuye n'ibiza n'abagizweho ingaruka na Covid-19.