Kuwa 30 Kanama 2020  mu cymba cy'inama muri Guest House ya Ngororero ubuyobozi bw’Akarere ka Ngororero buhagarariwe n’Umuyobozi w’Akarere wungirije ushinzwe iterambere ry’Ubukungu Bwana UWIHOREYE Patrick bwakoranye inama n’aborozi bororera mu nzuri za Gishwati hagamijwe kurebera hamwe imbogamizi zagaragaye mu ishyirwa mubikorwa ry’Umushinga n'uburyo buhamye bwo gucunga, kurinda ibyakozwe no gusana ibyakwangirika igihe umushinga uzaba ushoje imirimo yawo.

Nyuma yo gusuzuma imbogamizi zagaragaye mu gihe cyo gutera ibiti zishingiye cyane cyane ku biti bitakunze agace ka Gishwati n’uruhare ruto rw’aborozi mugihe cyashize no kuba muri iki gihe hari ibyangirika kubera uburangare(Ibiti bizitiye ingemwe bicanwa n’ibyuma byibwa), inama yemeje ibi bikurikira:
 Umworozi agomba gusimbuza ibyangiritse kubera uburangare,
 aborozi bagomba gukangurira abashumba kugira uruhare rufatika mu gucunga ibyakozwe.
  Hemejwe ko tariki ya 10 Nzeri hazaba inama n’aborozi n’isuzuma ry’ibimaze gukorwa kuri buri rwuri hamwe n’aborozi. Muri iyo nama kandi hazaganirwa ku masezerano rusange yo kwita ku biti byatewe n’ibizaterwa mu gihembwe cya Nzeri-Ukuboza 2020.
 Buri mworozi yasinye amasezerano yo kurinda ibyakozwe byose
 Akarere kazajya gahana abatubahirije ibikubiye muri aya masezerano ndetse n’abandi bakigaragaza umuco wo kuzerereza amatungo akangiza ibyakozwe.
Ba site mangers bamenyesheje inama ko  hamaze gutegurwa ingemwe 30,000 za Alnus mu rwego rwo kwitegura igihembwe cyo gutera ibiti.

Inama yitabiriwe kandi n'umukozi ukurikirana umushinga wa LAFREC Bwana NSENGIYUMVA Augustin n'umukozi w'Akarere ushinzwe amashyamba Bwana KAYITSINGA Jean n’urwego rw’Inkeragutabara ruhagarariwe na LT.COL JMV Kayitera.