Babyibukijwe mu nama yabahuje n'umuyobozi w'Akarere Bwana NDAYAMBAJE Godefroid na komite nyobozi ayoboye, inzego z'umutekano, n'abanyamabanga nshingwabikorwa b'imirenge kuri uyu wa mbere tariki ya 3/08/2020. Uretse ibijyanye n'icyorezo cya Coronavirus, inama yasuzumye ingingo y'umutekano, ibibazo bibangamiye imibereho myiza y,abaturage, ubwisungane mu kwivuza, gahunda ya EJO HEZA, imikorere n'imikoranire na manda irangiye y'abunzi.

Avuga ku ngingo yerekeye mutekano, umuyobozi w'inkeragurabara mu Karere ka Ngororero Lt Colonel Kayitera  yasabye abayobozi b'utugali n'imirenge kwusuzuma bakareba impamvu hakomeje kugaragara ubusinzi buherekejwe n'urugomo. Ibi bikaba bisobanuye ko hari aho kwirinda COVID-19 bitubahirizwa nk'uko amabwiriza abisaba.

Yunganiwe n'umuyobozi w'akarere wungirije ushinzwe imibereho myiza y'abaturage Madame Mukunduhirwe Benjamine washimiye uruhare rw'abayobozi mu kugikumira ananenga
 uburyo bamwe mu baturage bambara agapfukamunwa ari uko babonye umuyobozi runaka.
Yagarutse ku tubari twimuriwe mu ngo asaba ko byacika burundu. Abitwaza ko bari muri resitora bakanywa amacupa arenze rimwe nabo bakabicikaho.

Uyu muyobozi yibukije ko ingendo zitari ngombwa zigomba guhagarara kandi ubukangurambaga bugakomeza hifashishijwe megaphones. Yasabye ko iki gikorwa kitaharirwa  urubyiruko rw'abakorerabushake gusa. Yasabye Command Posts z'utugari n'imirenge kongera gushyira ikibatsi mu bukangurambaga, hagenzurwa abinjira bavuye ahandi bagapimwa ku gihe bagatangirwa raporo.

VmASOC yanavuze ku bibazo bibangamiye imibereho myiza y'abaturage, asaba abari mu nama kubikurikiranira hafi bikabonerwa ibisubizo by'umwihariko kubakira amazu abatishoboye aba nabo bakayafata neza. Yavuze ko hakiri abaturage bakirarana n'amatungo kandi ko hari ingo isuku igikomje kuba ikibazo. Ibi kugirango bicike yasabye ko inama za Task forces  z'utugari zakurikirana ibikorwa umunsi ku wundi kandi zigatangira raporo ku gihe.

Madame Mukunduhirwe  yanatanze ikiganiro ku ubwisungane mu kwivuza. Yagize ati cyaba ari ikibazo gikomeye kuba umuturage yarwara ntashobore kwivuza kubera ko atushyuye mituelle kandi afite ubushobozi
Kugeza ubu ku rwego  rw'Akarere mitweli yishyuwe ku  rugero rwa 48%. Hafi 1/2 cy'utugari 73 bari hasi ya 50%.
Madame Mukunduhirwe yasabye ko inzego z'utugari n'imirenge zashyiramo ikibatsi mitweli ikazamuka. Ati muri iki gihe duhanganye na COVID-19 buri muturage yakagombye kuba afite ubwisungane mu kwivuza.

Bose basabwe gufatira urugero ku mudugudu wa Vungu wo mu kagari ka Nsibo umurenge Nyange warangije kwishyura mitweli 100%.

Mayor NDAYAMBAJE yavuze ko kuba mitweli itishyurwa neza ari uko abayobozi b'utugari bakoze ubukangurambaga butimbitse. Yaboneyeho kubagaya. Abayobozi b'utugari biyemeje gukora ubukangurambaga budasanzwe ku buryo mu minsi 15 urugo ku rundi ruzaba rwishyuye.
Kugirango iyi ntego igerweho abayobozi b'utugari basinyanye amasezerano n'umuyobozi w'Akarere ku buryo muri ibi byumweru 2 hazaboneka  imisanzu ingana na 400,000,000 frws.

Umuyobozi w'Akarere yagarutse ku mikorere n'imikoranire asaba abayobozi kurangwa n'ubunyangamugayo kandi bagashyira hamwe kuko kubahiriza gahunda za Leta no kwesa imihigo bisaba ubufatanye bwimbitse. Yabasabye guhora hafi y'abaturage bakirinda kuva mu kagari uko bishakiye.

Naho umuyobozi w'Akarere wungirije ushinzwe iterambere ry'ubukungu Bwana Uwihoreye Patrick yavuze kuri gahunda ya EjoHeza. Ati iragenda neza gusa ngo haracyari abaturage bake batarinjira muri iyi gahunda. Aba bagomba kwigishwa bakitabira gahunda. Yavuze ko hari intego yo kwinjiza miliyoni 20 agaragaza uruhare rwa buri murenge, akagari n'umudugudu kugirnago intego igerweho.

Muri iyi nama hanavuzwe kuri manda y'abunzi irangiye. Umuyobozi wa Maj mu Karere yatangaje  ko umurimo w'ubwunzi ubaye weguriwe urwego rw'akagari n'umurenge. Yabashimiye umurimo ukomeye bakoze asaba ko ibikoresho byabo byabikwa neza kandi bitekanye. Abunzi bitwaye  neza bashimiwe naho abagize intenge nke banenzwe. Abataye cachets z'akazi basabwe kwiyambaza RIB zikaboneka.