Umunsi mpuzamahanga w'umwalimu wizihijwe ku nshuro ya 24 mu mirenge yose igize Akarere ka Ngororero ku nsanganyamatsiko igira iti: "Gusigasira uburezi nk'umwuga wubakiye ku bufatanye n'imikoranire myiza."  (Recasting teaching as collaborative profession)
Ku rwego rw'Akarere ibirori byabereye mu kigo cy'ishuli cya ASPADE NGORORERO aho umuyobozi w'Akarere wungirije ushinzwe imibereho myiza y'abaturage @MukunduhirweBe ari kumwe n'abayobozi b'inzego z'umutekano zikorera mu Karere yifatanije n'abayobozi b'ibigo by'amashuli abanza n'ayisumbuye n'abalimu bo mu murenge wa Ngororero. 
Muri ibi birori  hagarutswe ku myigire n'imyigishirize, discipline, school feeding, isuku n'isukura,  amahugurwa y'abalimu by'umwihariko mu rurimi rw'icyongereza,  greening and beautification mu mashuli. 
Hagarutswe no ku mbogamizi zikiriho nk'amwe mu mashuli y'inshuke akorera ahantu hadatunganye neza. Imbogamizi zirimo gushakirwa ibisubizo.
Abalimu bishimiye uburyo ubuyobozi bwiza bw'Igihugu cyacu bwitaye ku mibereho myiza yabo kuko bongerewe umushahara ndetse bakaba bibumbiye muri Koperative Umwalimu Sacco itanga inguzanyo ku buryo bunoze.
Abalimu bongeye kugaragaza ko batazigera batatira igihango cyo kurerera u Rwanda twese twifuza.
Ibigo byatsindishije 100% byahawe ibihembo.
Umuyobozi w'Akarere wungirije ushinzwe imibereho myiza y'abaturage ufite uburezi mu nshingano; mu ijambo yagejeje ku balimu yabasabye guhorana inyota yo kwihugura, guharanira ireme ry'uburezi, kurangwa n'imyitwarire myiza bizabafasha kurangiza neza inshingano bahamagariwe n'Igihugu. 
Uyu munsi mukuru wijihijwe mu gihe Akarere ka Ngororero kamaze gutera intambwe igaragara mu myigire n'imyigishirize. Muri uyu mwaka w'amashuli wa  2024-2025 ku rwego rw'Igihugu kaje ku mwanya wa 9 mu gutsinda ibizamini bisoza umwaka mu mashuli abanza; mu cyiciro rusange (O level) kaza ku mwanya wa 8
naho muri A level kaje ku mwanya wa 10.
Ikirenze ibyo umwana witwa Dufitumukiza Céléstin yabaye uwa mbere mu gihugu mu ishami rya Social Studies mu ma TTCs. Ni umunyeshuri wa TTC Muramba iherereye mu murenge wa Matyazo.