Abagore b'umudugudu wa Rebero mu kagari ka Kabaya, umurenge wa Kabaya bakuye amaboko mu bitenge. Babitangaje ubwo bizihizaga umunsi mpuzamahanga w'umugore wabereye mu mudugudu wabo ku rwego rw'Akarere.
 Nk'uko babyivugiye ngo umudugudu wabo nturangwamo imirire mibi n'igwingira ry'abana.

Nyirabaserura Valentine ni umwe mu  badamu bivuze ibigwi agaragaza uburyo yiteje imbere ahereye ku bihumbi 10 ubu akaba afite ihene 2 n'ingurube 2 bifite agaciro k'ibihumbi 90. Afite konti mu murenge Sacco, acuruza imboga n'imbuto, abana bariga nta mbogamizi.
Abagore bo mu mudugudu wa Rebero   bagaragaje kandi uburyo besheje imihigo: bafite amatsinda akoresha ikoranabuhanga,  biga imyuga, imiryango yose ifite uturima tw'igikoni n'ibiti by'imbuto ziribwa. Bafite irerero, isuku n'isukura biri mu ngo zose, nta muryango urangwamo amakimbirane.

Nyirabaja Felesita w'imyaka 92 mu muvugo we yagaragaje uburyo umugore ari ku ruhembe rw'iterambere. Yashimiye Umukuru w'Igihugu Nyakubahwa Perezida wa Repubulika Paul Kagame bakesha kuba bafite ijambo n'agaciro.
Umunsi mukuru waranzwe no kumurika ibyagezweho, kugaburira abana indyo yuzuye ku bufaranye n'umushinga Hinga Weze, kuremera  yirerero ry'umudugudu bariha ibikoresho no kuremera imiryango itishoboye

Umushyitsi mukuru muri ibi birori yari umuyobizi w'Akarere wungirije ushinzwe iterambere ry'ubukungu Bwana Uwihoreye Patrick. Yifashishije imibare yeretse abitabiriye ibirori uburyo umugore yahawe ijambo akaba aharanira iterambere mu nzego zifata ibyemezo kuva ku rwego rw'igihugu kugeza ku mudugudu. Yagarutse ku buryo igitsina gore baza mu myanya ya mbere mu mashuli kandi bakagaragaza ubuhanga  mu kazi. Yashimiye umudugudu wa Rebero uburyo witeje imbere asaba indi midugudu kuwukoramo urugendo shuli.

Mu bandi bitabiriye ibirori harimo umunyamabanga  nshingwabikorwa w'Akarere Bwana Abiyingoma Gérald, inzego z'umutekano, abajyanama mu Inama Njyanama y'Akarere, inzego z'Inama y'Igihugu y'Abagore n'iz'urubyiruko n'intumwa z'umushinga Hinga Weze. Ibirori byashojwe n'ubusabane.